जबरदस्त! दिवाळीपूर्वी कोल इंडियाकडून बोनस, कर्मचाऱ्यांच्या खात्यात १.०३ लाख रुपये जमा होणार

कोल इंडियाने त्यांच्या २.२० लाख कर्मचाऱ्यांसाठी दुर्गा पूजा बोनस जाहीर केला आहे. यावर्षी त्यांना १.०३ लाख रुपयांचा बोनस मिळणार आहे. मागील वर्षी पेक्षा हा बोनस जास्त आहे.

कोल इंडियाच्या कर्मचाऱ्यांसाठी आनंदाची बातमी आहे. दुर्गा पूजेच्या आधीच कोल इंडियाच्या २.२० लाख कर्मचाऱ्यांना बोनस मिळणार आहे. व्यवस्थापनाची आणि कामगार संघटनेची मागील काही दिवसांपासून बैठका सुरू आहेत. या बैठकीनंतर आता बोनस रकमेवर एक करार झाला आहे. या वर्षी, कर्मचाऱ्यांना १.०३ लाखांचा बोनस मिळेल. ही रक्कम आज सर्व कर्मचाऱ्यांच्या बँक खात्यात हस्तांतरित केली जाणार आहे.

गेल्या वर्षीच्या तुलनेत या वर्षी बोनसमध्ये वाढ केली आहे. मागील वर्षी ९३,७५० रुपये बोनस मिळाला होता. या वाढीमुळे कोळसा कामगारांमध्ये आनंदाचे वातावरण आहे. दिवाळीही काही दिवसातच सुरू होणार आहे. या पार्श्वभूमीवर कर्मचाऱ्यांना हा बोनस देण्यात येणार आहे. 

पाकिस्तानच्या पंतप्रधानांचा पुन्हा आंतरराष्ट्रीय अपमान! ट्रम्प यांनी व्हाईट हाऊसमध्ये बोलावून ताटकळत ठेवले

दोन बैठकांनंतर एकमत झाले

कोलकाता येथील एका हॉटेलमध्ये कर्मचारी संघटना आणि व्यवस्थापनामध्ये बैठका झाल्या.  व्यवस्थापनाने सुरुवातीला ९८,५०० रुपये देण्याचे मान्य केले, तर पाच कामगार संघटनांनी १.२५ लाख रुपयांचा आग्रह धरला.

गेल्या वर्षीच्या तुलनेत कोल इंडियाचा नफा लक्षणीयरीत्या वाढला आहे, त्यामुळे बोनसही जास्त असावा, असा युनियनचा युक्तिवाद होता. या मागणीवरून राष्ट्रीय खाण कामगार महासंघाने बैठकीतून सभात्यागही केला.

रात्री उशिरा निर्णय घेतला

रात्री ११.५० च्या सुमारास बैठक पुन्हा सुरू झाली आणि दोन्ही पक्षांनी अखेर १.०३ लाख रुपयांवर करार केला. कंपन्यांची आर्थिक परिस्थिती अजूनही पूर्णपणे मजबूत नाही आणि जास्त बोनस दिल्याने भविष्यात समस्या निर्माण होऊ शकतात, व्यवस्थापनाने असा युक्तिवाद केला.

या कंपन्यांच्या कर्मचाऱ्यांना फायदा होणार

या बोनसचा फायदा कोल इंडियाच्या विविध उपकंपन्यांमधील लाखो कर्मचाऱ्यांना होईल, यामध्ये BCCL, CCL, ECL, CMPD, MCL, NCL आणि SECL यांचा समावेश आहे.

झारखंडमधील कोळसा कामगारांना सर्वाधिक फायदा होईल, ज्यांचे वेतन अंदाजे 800 कोटी असेल. यापैकी एकट्या BCCL ला अंदाजे 320 कोटी आणि CCL ला 310 कोटी मिळतील.