अडीच दशकांच्या सत्तेला सुरुंग?

अडीच दशकांच्या सत्तेला सुरुंग?

 गेल्या पंचवीस वर्षांपासून देवळालीत एकहाती सत्ता आणण्याचे काम बबनराव शंकरराव घोेलप आणि शिवसेनेने केलेले असताना, यंदा पहिल्यांदाच न्यायालयाच्या एका फटकाऱ्यासरशी दोन्हींची सत्ता होत्याची नव्हती होण्याची शक्यता आहे.
देवळाली तसे पाहता १९९५ पासूनच शिवसेनेचा बालेकिल्ला बनून राहिला आहे. मध्यंतरीच्या एका निवडणुकीत ए.बी. फॉर्मचा घोळ सोडला, तर देवळालीत अनुसूचित जाती संवर्गासाठी राखीव असलेल्या या मतदारसंघातून सातत्याने शिवसेना आणि आमदार बबनराव घोेलप निवडून येत असल्याचे समीकरण जुळले आहे. यंदा मात्र त्यात फार मोठी उलटफेर होण्याची चिन्हे न्यायालयाच्या एका निकालाने केली आहेत. आमदार बबनराव घोलप यांना न्यायालयाने अवैध संपत्तीच्या प्रकरणात निवडणूक लढविण्यास बंदी घातली आहे. त्यामुळे देवळालीत शिवसेनेतील अन्य इच्छुकांना धुमारे फुटले आहेत, तर राष्ट्रवादीच्या अपेक्षा उंचावल्या आहेत. घोलपच समोर नसतील तर विजय पक्का हे समीकरण जुळवित राष्ट्रवादीतील इच्छुकांची संख्या वाढली आहे. आघाडी आणि युती झालीच तर हा मतदारसंघ आघाडीकडून राष्ट्रवादीच्या पारड्यात व युतीकडून अर्थातच सेनेच्या पारड्यात जाणार आहे.
नुकत्याच झालेल्या लोकसभा निवडणुकीत या मतदारसंघातून शिवसेनेच्या हेमंत गोडसे यांना मिळालेली आघाडीही लक्षणीय मानली जाते. तसेही देवळाली सेनेचा बालेकिल्ला असूनही येथून सचिन ठाकरे व हेमंत गोडसेंच्या रूपाने मनसेचे अस्तित्व बऱ्यापैकी निर्माण झालेले असतानाच हेमंत गोडसे यांनी मनसेला सोडचिठ्ठी देत शिवबंधन बांधून लोकसभेत भगवा फडकविल्याने तर देवळालीत बऱ्यापैकी भगवे वारे वाहू लागले आहेत. त्यातच नुकत्याच झालेल्या पंचायत समिती सभापती व उपसभापतिपदाच्या निवडणुकीत उपसभापतिपदी अनिल ढिकले यांची निवड ही जशी सेनेच्या दृष्टीने प्रतिष्ठा वाढविणारी तशी मनसे आणि कॉँग्रेसच्या दृष्टीने ती प्रतिष्ठा घालविणारी ठरली आहे. देवळालीत असलेल्या शहरालगतच्या ४० खेड्यांमध्ये शिवसेना आणि राष्ट्रवादी अशीच लढत असली, तरी आता अनिल ढिकले, प्रकाश बदादे यांच्यासारख्या कॉँग्रेसजनांनी शिवसेनेत प्रवेश केल्याने शिवसेनेची बाजू भक्कम, तर राष्ट्रवादीची लंगडी पडली आहे. मात्र त्यातही पश्चिम पट्ट्यातील एकगठ्ठा आदिवासी मतदान असलेला व सेनेच्या पट्ट्यातील नाते-गोत्याचे संबंध असलेल्या नितीन मोहितेसारख्या कॉँग्रेसच्या उमेदवाराला राष्ट्रवादीकडून उमेदवारीचे बूस्टर मिळाल्यास घोलप नसल्याने काहीही घडू शकते. तूर्तास सर्व वेट अ‍ॅन्ड वॉचच्या भूमिकेत आहे.