गोकुळ सोनवणे/ नरेंद्र दंडगव्हाळ /ऑनलाइन लोकमत
नाशिक, दि. 7 - अखेर नाशिक शहरातील बेकायदा भंगार बाजार हटविण्यास आज सकाळी सुरुवात झाली आहे. प्रचंड पोलीस बंदोबस्त आणि महापालिका कर्मचाऱ्यांचा कारवाईत समावेश आहे. एकाच भागात एवढ्या मोठ्या प्रमाणावर व्यावसायिक अतिक्रमणे हटविण्याची ही पहिलीच वेळ आहे
नाशिक शहरातील सातपूर अंबड लिंक रोडवर गेल्या 17 वर्षापासून हा बाजार वसला होता. परप्रांतियांनी कब्जा केलेला हा बाजार नागरी वसाहतीत असून त्यात एक हजाराहून अधिक भंगार दुकाने आहेत. या बाजारात भंगार जळण्यामुळे प्रदूषण होते, शिवाय चोरीच्या वस्तू विक्री तसेच अन्य कारणामुळे कायदा आणि सुव्यस्थेचा प्रश्न निर्माण झाला होता. महापालिकेने हा बाजार हटविण्यासाठी तयारी केल्यानंतर व्यवसायिकांनी आधी उच्च आणि नंतर सर्वोच्च न्यायालयात धाव घेतली होती. पण तेथे त्यांचा टिकाव लागला नाही. त्यानंतर राजकीय दबावामुळे आजवर हा बाजार हटविला जात नव्हता. आता महापालिका आणि पोलीस आयुक्तांनी मनावर घेतल्याने भंगार बाजारावर हातोडा पडणार हे अटळ झाले. काल पोलिसांनी या भागातून संचालन केल्यानंतर कारवाई होणारच अशी खात्री पटल्याने रात्री व्यवसायिकांनी बाजारातील सर्व साहित्य हलविले, त्यामुळे भंगार बाजारात आज सकाळ पासून शुकशुकाट आहे. महापालिका कर्मचाऱ्यांनी जेसीबीच्या सहाय्याने बाजार हटवण्यास प्रारंभ केला आहे. महापालिकेने या कारवाई साठी सहा पथके तयार केली असून ही कारवाई आठवडाभर चालणार आहे.