प्रभागांमध्ये तोडफोड; कार्यक्षेत्र विस्तारले

प्रभागांमध्ये तोडफोड; कार्यक्षेत्र विस्तारले

नाशिकरोड : आरक्षण सोडतीमध्ये प्रभाग रचनेत बदल झाल्याने विद्यमान नगरसेवकांना नूतन प्रभागांमध्ये मतदार शोधण्याची वेळ येणार आहे. बहुतांश नगरसेवकांचा प्रभाग विस्तारल्याने त्यांच्यापुढे कार्यक्षेत्रात संपर्क वाढविण्याचे आव्हान असणार आहे.
प्रभाग २१ मध्ये सरमिसळ
नवीन प्रभाग २१ मध्ये सध्याच्या प्रभाग ५८, ५९, ५५ काही भाग व प्रभाग ६० चा थोडासा भाग समाविष्ट करण्यात आला आहे. सरमिसळ परिसर असलेल्या नवीन प्रभाग २१ (अ) अनुसूचित जाती महिला, (ब) नागरिकांचा मागासवर्ग प्रवर्ग, (क) सर्वसाधारण महिला, (ड) सर्वसाधारण असे आरक्षण आहे. अनुसूचित जाती महिला आरक्षणामुळे नगरसेवक वैशाली दाणी, कोमल मेहरोलिया व रमेश धोंगडे, संगीता गायकवाड यांना निवडणूक लढण्यास अडचण येणार नाही. अनुसूचित जाती महिला आरक्षणामुळे नगरसेवक सुनील वाघ यांची अडचण झाली असली तरी त्यांना सर्वसाधारणचा मार्ग खुला आहे. सध्याच्या प्रभाग ५९ व ५५ चा परिसर नवीन प्रभाग २०, २१ मध्ये कमी जास्त समाविष्ट असल्याने तेथील नगरसेवक कुठल्या प्रभागात उडी मारतात, हे परिस्थितीनुसार स्पष्ट होईल. प्रभागरचनेनुसार या ठिकाणी देखील इच्छुकांची भाऊगर्दी राहणार आहे. प्रभागाची लोकसंख्या ४,७६८ इतकी असून अनुसूचित जाती १०,७२२ व जमातीची ९९० आहे.
गावठाणचा प्रभाग २२
नवीन प्रभाग २२ मध्ये सध्याचा प्रभाग ६०, ६१ चा बहुतांश भाग समाविष्ट झाला असून प्रभाग ५५, ५७ चा काहीसा भाग समाविष्ट करण्यात आला आहे. प्रभाग २२ (अ) अनुसूचित जाती महिला (ब) नागरिकांचा मागासवर्ग प्रवर्ग महिला, (क) सर्वसाधारण महिला, (ड) सर्वसाधारण असे आरक्षण झाले आहे. त्यामुळे विद्यमान नगरसेवक नयना वालझाडे, सुनीता कोठुळे यांची अडचण होणार नाही.
मात्र सर्वसाधारण जागेकरिता सूर्यकांत लवटे, केशव पोरजे दावेदार राहणार असल्याने पक्षासमोर अडचण निर्माण होणार आहे. गुडघ्याला बाशिंग बांधून असलेली काही इच्छुक स्वत:हून थांबण्याची शक्यता आहे. नवीन प्रभागरचनेमुळे नगरसेवक व इच्छुकांमध्ये ‘कही खुशी कही गम’चे वातावरण आहे. (प्रतिनिधी)