चांदवडला एक लाख भाविक

रेणुकामातेचे दर्शन : दसरा उत्साहात साजरा

चांदवड : शहरात विजयादशमीनिमित्त येथील कुलस्वामिनी श्री रेणुकादेवी मातेच्या मंदिरात एक लाख भाविकांनी दर्शनाचा लाभ घेतला. दरवर्षीच्या तुलनेत यंदाच्या वर्षी भाविकांनी दर्शनासाठी प्रचंड गर्दी केली होती.
श्री रेणुकादेवी मातेच्या पालखीची सवाद्य मिरवणूक काढण्यात आली. पालखीत श्री रेणुकामातेची प्रतिमा, सुवर्ण अलंकार, अहल्यादेवीची
प्रतिमा असते. या पालखीस मोठा बंदुकधारी पोलीस बंदोबस्त असतो. सदरची पालखी रेणुका
मंदिरातून पुरातन मनमाड-लासलगाव चौफुलीवरील श्री खंडेराव महाराज मंदिरात नेण्यात आली. यावेळी पालखीस ठिकठिकाणी सुवासिनींनी ओवाळले.
श्री रेणुकादेवी मंदिराचा गाभारा विविध फुलांनी सजावट करण्याचे काम बाळासाहेब होनराव यांनी केले.
येथील म्हसोबा चौकीवरील सप्तशृंगी देवी मंदिरातील पुजारी हौशाबाई विठ्ठल भोसले, म्हसोबा मंदिर व बाबूराव वस्ताद या दोन्हीही जागृत मंदिरात नवरात्र उत्सवानिमित्त विविध कार्यक्रमांचे आयोजन केले होते. त्याचे पुजारी शांताबाई रानडे, म्हसोबा मंदिराचे पुजारी वसंत सखाराम अहेर यांनी व्यवस्था पाहिली तर अष्टमीला सप्तशृंगी मंदिरात घागरी फुंकण्याचा व राहाडीचा कार्यक्रम झाला.
गावातील श्री महालक्ष्मी मंदिर, गुजराथ गल्लीतील कच्छादेवी, तुळजाभवानी मंदिराची व्यवस्था वृत्तपत्र विक्रेते सोनुपंत ठाकरे, सूर्यकांत ठाकरे, जयवंत ठाकरे यांनी बघितली. कालिका मंदिराची व्यवस्था गोसावी परिवाराने बघितली. या सर्व मंदिरात भाविकांनी दर्शनासाठी गर्दी केली होती. ठिकठिकाणी महाप्रसादाचे आयोजन करण्यात आले होते.
याप्रसंगी रेणुकादेवी संस्थानच्या वतीने व्यवस्थापक एम. के. पवार, पोलीस निरीक्षक अनंत मोहिते, सहायक पोलीस निरीक्षक जितेंद्र भारती, कैलास चौधरी यांच्या मार्गदर्शनाखाली पोलीस व गृहरक्षक दलाने चोख बंदोबस्त ठेवला. नऊ दिवस साजरा होणारा नवरात्रोत्सव कुठलाही अनुचित प्रकार न घडता झाल्याबद्दल संस्थानच्या वतीने पवार व पोलीस प्रशासनाच्या वतीने बहिरट यांनी भाविकांना धन्यवाद दिले. (वार्ताहर)