मालेगाव : शहरातील आंबेडकर पूल ते छत्रपती शिवाजी चौकपर्यंतचा रस्ता हा अतिक्रमणधारकांसाठी तसेच अवैध धंदे करणाऱ्यांसाठी आरक्षित म्हणून घोषित करून त्यांना आवश्यक सुविधा पुरविण्यात याव्यात, अशी उपहासात्मक मागणी येथील सार्वजनिक नागरी सुविधा समितीतर्फे मनपा आयुक्त अजित जाधव यांच्याकडे निवेदनाद्वारे करण्यात आली आहे. शहरातील आंबेडकर पुलालगतच्या अवैध व्यवसायांची वस्ती साधारणत: आठ वर्षांपूर्वी मनपा - प्रांत व पोलीस प्रशासनाने संयुक्त मोहीम आखून हटविली होती. त्या जागेवरून आंबेडकर पूल ते सांडवा पुलादरम्यान पूर्वभागात रस्ता तयार करण्यात आला होता. या रस्त्यालगत उद्यानही तयार करण्यात आले होते. मात्र कालांतराने येथील परिस्थितीत बदल झाला आहे. सदर रस्त्याच्या दुतर्फा फर्निचर व्यावसायिकांचे मोठ्या प्रमाणावर अतिक्रमण झाले आहे. इतर व्यावसायिकांचेही अतिक्रमण दिवसेंदिवस वाढत आहे. येथील सोडाविक्रीच्या गाड्यांवर सर्रासपणे दारूविक्रीचा धंदा सुरू आहे. चार दिवसांपूर्वी याच गाड्यांवर दारू विक्रीतून हाणामारी होऊन एकावर प्राणघातक हल्ला करण्यात आला होता. सततचे अतिक्रमण व अवैध धंद्यांनी पुन्हा तोंड वर काढल्याने या भागातून ये - जा करणाऱ्या शहर - तालुक्यातील जनतेला मोठ्या अडचणींचा सामना करावा लागत आहे. स्थानिक मनपा व पोलीस प्रशासनही याकडे सोयीस्कर दुर्लक्ष करत आहे. याबाबत तक्रार करूनही दोन्ही प्रशासनाकडून उचित अशी कारवाई केली गेलेली नाही. त्यामुळे सदर भाग अतिक्रमणधारक व अवैध धंदे करणाऱ्यांसाठी आरक्षित म्हणून घोषित करावा, अशी उपहासात्मक मागणी सार्वजनिक नागरी सुविधा समितीतर्फे मनपा आयुक्त जाधव यांच्याकडे निवेदनाद्वारे करण्यात आली आहे.