वाद झाला अन् दारूच्या नशेत असलेल्या मुलाने बापाच्या पोटात खुपसला चाकू, नाशिकमधील घटना

पित्याचा खून केल्याच्या कारणावरून पोलिसांनी अश्विन सखाराम भावसारला अटक केली आहे.

Nashik crime: कौटुंबिक कारणावरून झालेल्या वादातून रागाच्या भरात पेठ रोडवरील नवनाथनगरला राहणाऱ्या पोटच्या ३५ वर्षीय मुलाने ६५ वर्षीय वृद्ध पित्याच्या पोटात धारदार चाकूने वार करून गंभीर जखमी केले होते. सव्वा महिन्याभरापूर्वी घडलेल्या घटनेनंतर गंभीर जखमी झालेल्या पित्याचा उपचार सुरू असताना मंगळवारी (१७ मार्च) मृत्यू झाल्याने मुलावर पंचवटी पोलीस ठाण्यात खुनाचा गुन्हा दाखल करण्यात आला आहे.

सखाराम पंडित भावसार (६५) असे चाकू हल्ल्यात जखमी होऊन मृत्यू पावलेल्या वृद्ध पित्याचे नाव आहे. पित्याचा खून केल्याच्या कारणावरून पोलिसांनी अश्विन सखाराम भावसारला अटक केली आहे. ५ फेब्रुवारी रोजी दुपारी रोकडे चाळ येथे राहणाऱ्या दोघा भावसार पिता-पुत्रात कौटुंबिक कारणावरून वाद झाला होता. 

त्यावेळी दारूच्या नशेत संशयित आरोपी अश्विन याने वडील सखाराम यांना शिवीगाळ करत हातातील धारदार चाकूने पोटात डाव्या बाजूला वार केला. त्यात सखाराम गंभीर जखमी झाल्याने त्यांना तत्काळ उपचारासाठी रुग्णालयात दाखल करण्यात आले. तेथे उपचार सुरू असताना मंगळवारी त्यांचा मृत्यू झाला.