पंचवटीत १४४ मंडळांनी केले अर्ज दाखल

गणेशोत्सव : पाच मौल्यवान मंडळांचा समावेश

पंचवटी : पंचवटी पोलीस ठाण्यासह म्हसरूळ व आडगाव पोलीस ठाण्याची हद्द धरून पंचवटीत एकूण १४४ छोट्या-मोठ्या सार्वजनिक गणेशोत्सव मित्रमंडळांनी गणेशोत्सव साजरा करण्यासाठी संबंधित पोलीस ठाण्यात अर्ज सादर केले आहेत. १४४ मंडळांपैकी पाच मंडळे मौल्यवान आहेत. पंचवटीत यंदाही दरवर्षीप्रमाणे गणेशोत्सव मित्रमंडळांनी गणेशोत्सव प्रतिष्ठापनेची परंपरा कायम ठेवली आहे. पंचवटीतील छोट्या-मोठ्या सार्वजनिक मित्रमंडळांनी धार्मिक, सामाजिक देखाव्यांवर भर दिला आहे.पंचवटी पोलीस ठाण्याच्या हद्दीत ५४, म्हसरूळला ५०, तर आडगाव पोलीस ठाण्याच्या हद्दीतील ४० अशा एकूण १४४ मित्रमंडळांनी गणेशोत्सव साजरा करण्यासाठी पोलीस ठाण्यात परवानगी अर्ज सादर केले होते. पंचवटी पोलीस ठाण्याचे काही दिवसांपूर्वी विभाजन करून म्हसरूळ पोलीस ठाणे करण्यात आल्याने पंचवटीचा बराचसा भाग म्हसरूळ पोलीस ठाण्याच्या हद्दीला जोडला गेला आहे, त्यामुळे पंचवटीतील गतवर्षीच्या मंडळांपैकी निम्म्याने मंडळांची संख्या वर्ग झाली आहे. (वार्ताहर)