विनय गौडा यांची सातारा जि.प.च्या सीईओपदी बदली
By लोकमत न्यूज नेटवर्क | Published: September 25, 2020 12:55 PM2020-09-25T12:55:53+5:302020-09-25T12:56:00+5:30
लोकमत न्यूज नेटवर्क नंदुरबार : जिल्हा परिषदेचे मुख्य कार्यकारी अधिकारी विनय गौडा यांची सातारा जिल्हा परिषदेच्या मुख्य कार्यकारी अधिकारीपदी ...
लोकमत न्यूज नेटवर्क
नंदुरबार : जिल्हा परिषदेचे मुख्य कार्यकारी अधिकारी विनय गौडा यांची सातारा जिल्हा परिषदेच्या मुख्य कार्यकारी अधिकारीपदी बदली झाली आहे. १७ महिन्यांपूर्वी त्यांची तळोदा प्रकल्प अधिकारी पदावरून येथे बदली झाली होती. गौडा यांच्या जागी अद्याप कुणाचीही नियुक्ती झालेली नाही. गौडा यांनी आपल्या कार्यकाळात घरकुल योजना, झिरो पेडन्सी, पाणी पुरवठा योजनांची कामे चांगली केली. आंतरजिल्हा शिक्षक बदलीच्या राज्य समन्वयक म्हणून देखील त्यांनी काम पाहिले.
जिल्हा परिषदेचे मुख्य कार्यकारी अधिकारी विनय गौडा यांच्या बदलीचे आदेश गुरुवारी दुपारी येथे प्राप्त झाले. गौडा यांनी १९ फेब्रुवारी २०१९ रोजी मुख्य कार्यकारी अधिकारी पदाचा पदभार स्विकारला होता. त्या आधी ते तळोदा येथे प्रकल्प अधिकारी व सहायक जिल्हाधिकारी म्हणून दिड वर्ष काम पाहिले होते.
गौडा यांनी आपल्या दीड वर्षाच्या कार्यकाळात जिल्हा परिषदेच्या माध्यमातून घरकुल योजनेवर भर दिला होता. योजना प्रभावीपणे राबविणारी नंदुरबार जिल्हा परिषद राज्यात अव्वल ठरली होती. याशिवाय पाणी नमुने संकलन व तपासणीत देखील जिल्हा परिषद राज्यात सतत दोन वर्ष अव्वल ठरली आहे. झिरो पेडन्सीसाठी त्यांनी विशेष प्रयत्न केले आहेत.
जिल्हा परिषद प्राथमिक शिक्षकांच्या आंतर जिल्हा व जिल्हाअंतर्गत बदलीच्या धोरणाचा अभ्यास करण्यासाठी नेमलेल्या राज्यस्तरीय समितीत ते प्रमुख अधिकारी होते. यंदाच्या आॅनलाईन बदल्यांचे मुख्य समन्वयक म्हणून त्यांनी काम पाहिले.
त्यांच्या कार्यकाळात सर्वाधिक काळ हा आचारसंहितेत गेला होता. त्यात लोकसभा, विधानसभा व जिल्हा परिषद निवडणुका झाल्याने सहा ते सात महिने आचारसंहितेत गेले. असे असतांनाही त्यांनी जास्तीत जास्त निधी खर्च करण्यावर व योजना राबविण्यावर देखील विनय गौडा यांनी भर दिला होता.
पदभार प्रभारी अतिरिक्त सीईओंकडे
४अतिरिक्त सीईओंचे पदही रिक्त आहे. हा पदभार ग्रामपंचायत विभागाचे उपमुख्य कार्यकारी अधिकारी शेखर रौंदळ यांच्याकडे आहे. आता सीईओंचा प्रभारी पदभारही त्यांच्याकडे राहणार आहे. नवीन सीईओ कुणाची नेमणूक होते याकडे आता लक्ष लागून आहे.