नंदुरबार : कोरोनाच्या गेल्या वर्षभराच्या काळात आरोग्य व पोलीस कर्मचाऱ्यांनी प्रामाणिकपणे आपली सेवा बजावली आहे. परंतु ते करीत असताना या कर्मचाऱ्यांना मानसिक थकव्याला देखील सामोरे जावे लागत आहे. त्यासाठी या दोन्ही विभागाच्या प्रमुखांनी कर्मचाऱ्यांसाठी विविध उपक्रम राबविले असून त्याचा सकारात्मक परिणाम झालेला दिसून येत आहे.
पोलीस दलातर्फे पोलीस अधीक्षक महेंद्र पंडित यांनी आपल्या कर्मचाऱ्यांनी दक्षता घेतली आहे. विविध आजार असलेल्या कर्मचाऱ्यांना कोविडच्या ठिकाणी आणि ताणाच्या ठिकाणी ड्युटी लावली जात नाही. ५० वर्षापेक्षा अधिक वय असलेल्या पोलिसांना देखील ताणाच्या ठिकाणी ड्युटी देण्यास विचार केला जातो. मास्क, सॅनिटायझर यांचा वापर करून सोशल डिस्टन्सिंग यांना प्राधान्य देण्याच्या सूचना आहेत.
अशीच स्थिती आरोग्य कर्मचाऱ्यांची देखील आहे. आरोग्य कर्मचारी प्रत्यक्षात रुग़्णांची सेवा करीत आहेत. अशा वेळी त्यांना ड्युटी आणि कुटुंब अशी कसरत करावी लागत आहे. रुग्णसेवेला सर्वोच्च प्राधान्य त्यांच्याकडून असते.
लसीकरण, योगा, प्राणायामातून तणाव मुक्तता
सर्वात आधी कोरोनाची भीती दूर व्हावी म्हणून पोलीस अधीक्षकांनी सर्व पोलिसांचे लसीकरण करण्यावर भर दिला व त्याची योग्य प्रमाणात अंमलबजावणी करण्यात आली. त्याशिवाय योगा, प्राणायाम, व्यायाम यातून पोलीस आपला थकवा घालवून मानसिकदृष्ट्या सक्षम राहण्याचा प्रयत्न करीत आहेत. पोलिसांचे दोन्ही डोस कसे पूर्ण होतील याकडे विशेष लक्ष देण्यात आले. आरोग्य यंत्रणेतील डॉक्टर, परिचारिका व इतर स्टाफ हे देखील योगा प्राणायाम करून मानसिक थकवा घालवत आहेत.