जिल्हा प्रशासन, ग्रामपंचायत आणि युनिसेफ यांच्या संयुक्त प्रयत्नातून काठी प्राथमिक आरोग्य केंद्रांतर्गत या शिबिराचे आयोजन करण्यात आले. शिबिराच्या नियोजनासाठी सरपंच मनोज तडवी यांच्या उपस्थितीत शिक्षक, आरोग्य कर्मचारी, आशा कार्यकर्ती, युनिसेफ प्रतिनिधी यांची बैठक घेण्यात आली. मोलगी गावातील प्रत्येक पाड्यावर ध्वनिक्षेपकाद्वारे लसीकरणाबाबत माहिती देण्यात आली. शिक्षकांनी जनजागृतीचे काम उत्तमरीतीने केले.
युनिसेफ प्रतिनिधी, आशा कार्यकर्ती आणि शिक्षकांनी लसीकरणासाठी पात्र नागरिकांची यादी तयार केली. सुरुवातीला स्थानिक लोकप्रतिनिधींचे लसीकरण करून त्याच्याद्वारे नागरिकांना आवाहन करण्यात आले. प्रत्येक पाड्याला भेट देण्यात येऊन नागरिकांच्या मनातील गैरसमज दूर करण्याचा प्रयत्न यशस्वी ठरला. जिल्हा परिषद शाळेच्या शिक्षकांनी नागरिकांना लसीकरणासाठी प्रोत्साहित केले. त्यामुळे शिबिराला मिळणारा प्रतिसाद वाढला.
नागरिकांनी स्वत: लसीकरण करून इतरांनाही लसीकरणासाठी प्रेरित करावे, तसेच कोरोना विषयक मार्गदर्शक सूचनांचे पालन करावे आणि अफवांवर विश्वास ठेवू नये, असे आवाहन खासदार डॉ. हीना गावित यांनी यावेळी केले. तहसीलदार रामजी राठोड यांनी शिबिराच्या आयोजनाविषयी माहिती दिली आणि नागरिकांना लसीकरणाचे आवाहन केले.
कार्यक्रमास गटविकास अधिकारी नंदकिशोर सुर्यवंशी, तालुका वैद्यकीय अधिकारी डॉ. स्वप्निल मालखेडे, डॉ. कुलदीप ठाकरे, युनिसेफ तालुका समन्वयक जितेंद्र वळवी, बिजगव्हाणचे सरपंच रोशन तडवी, जिल्हा नियोजन समिती सदस्या बबिता नाईक, जि. प.चे माजी सदस्य नीतेश वळवी, आदी उपस्थित होते.
शिबिरासाठी मंडप उभारण्यात आला होता. नागरिकांच्या नोंदणीसाठी विविध कक्षांची सुविधा उपलब्ध करून देण्यात आली होती. दुरून येणाऱ्या नागरिकांसाठी बिस्किटे आणि दुपारी खिचडीची व्यवस्था करण्यात आली. आशा कार्यकर्ती, आरोग्य सेवक आणि युनिसेफ प्रतिनिधी नागरिकांना मार्गदर्शन करीत होते. शिबिराच्या ठिकाणी आरटीपीसीआर चाचणीचीही व्यवस्था करण्यात आली होती. आरोग्य सेवक आणि आरोग्य सेविकांनी लसीकरणाचे काम पाहिले.
सुरुवातीला लसीकरणासाठी खूप विरोध होता. मात्र, प्रशासनातील सर्व यंत्रणा आणि युनिसेफ प्रतिनिधींनी जनजागृतीवर भर दिला. स्थानिक लोकप्रतिनिधींचे लसीकरण करून त्यांच्याद्वारे आवाहन करण्यात आले. मिळणारा प्रतिसाद सर्वांचा उत्साह वाढविणारा आहे. आरोग्य यंत्रणा आणि शिक्षक विशेष प्रयत्न करीत आहेत.
-जितेंद्र वळवी, युनिसेफ तालुका प्रतिनिधी