कोरोना प्रतिबंध लसीकरणाबाबत समाजामध्ये मोठ्या प्रमाणात गैरसमज दिसून येत आहेत. लसीबाबत समाजामध्ये भीती पसरली असून, लसीकरणासाठी लोक स्वयंस्फूर्तीने पुढे येत नसल्याचे चित्र आहे. लोकांच्या मनातील ही भीती नष्ट व्हावी व नागरिकांनी लसीकरणासाठी स्वतःहून पुढे यावे यासाठी तळोदा येथील महात्मा फुले समाजकार्य महाविद्यालयाकडून जनजागृती व समुपदेशनाचे कार्य मागील पंधरवड्यापासून सुरू आहे. त्यांनी केलेल्या प्रयत्नातून तळोदा शहरातील बोहरी समाजातील ५० व्यक्तींचे लसीकरण आतापर्यंत झाले आहे.
यासाठी बोहरी समाजाच्या मस्जिदमध्ये जाऊन लसीकरणाची उपयुक्तता व लसीकरणाचे फायदे आदींविषयी प्रा. योगेश सोनवणे, प्रा. रामचंद्र परदेशी यांनी प्रबोधन केले होते. त्याचा सकारात्मक परिणाम दिसून आला असून, गुरुवारी (दि. १३) उपजिल्हा रुग्णालयात बोहरी समाजातील ५० नागरिकांनी लसीकरण केले. त्यासाठी वैद्यकीय अधिकारी डॉ. विजय पाटील, विशाल चौधरी, तुषार चौधरी, विजय चौधरी यांनी सहकार्य केले. यावेळी मुल्ला मुर्तूजा हामिद बोहरी, हासिम बोहरी, नुरुद्दीन बोहरी, शबू बोहरी, जैनुल मर्चंट, मोयज बोहरी, वजफा बोहरी, हुमेद बोहरी, आदी उपस्थित होते.