नंदुरबार : शहादा, नंदुरबार तालुक्यासह धुळे जिल्ह्यातून दुचाकी चोरणारा चोरट्यास एलसीबीने मध्य प्रदेशातील मलफा गावातून अटक केली. त्याने १२ दुचाकी चोरल्याचे कबूल केले आहे. त्याच्यासोबत अल्पवयीन तीन चोरटे देखील सहभागी असल्याचे त्याने सांगितले.
मनोज दत्तू चव्हाण, रा.मलफा, ता.पानसेमल असे अटक केलेल्या संशयिताचे नाव आहे. नंदुरबार व शहादा तालुक्यातून दुचाकी चोरीच्या घटना वाढल्यामुळे पोलिसांच्या तपासाविषयी नाराजी व्यक्त केली जात होती. त्यामुळे पोलीस अधीक्षकांनी एलसीबीला दुचाकी चोरट्यांच्या मुसक्या आवळण्याच्या सूचना केल्या होत्या. एलसीबीचे निरीक्षक विजयसिंग राजपूत यांनी याबाबत लक्ष केंद्रित करून पथकाला सूचना दिल्या.
एका घटनेतील चोरटा हा मध्य प्रदेशातील मलफा, ता.पानसेमल येथील असल्याची पक्की खबर राजपूत यांना मिळाल्याने त्यांनी पथकाला त्याबाबत कारवाईच्या सूचना दिल्या. त्यानुसार पथकाने मलफा गावात पाळत ठेवली. चव्हाण याच्या हालचालींवर लक्ष ठेवले. सावज टप्प्यात येताच त्याला जेरबंद केले. त्याने कोळदा, ता.नंदुरबार येथील दुचाकी चोरल्याचे मान्य केले. पुन्हा त्याला विश्वासात घेऊन अधिक चौकशी केली असता त्याने शहादा येथून तीन, सारंगखेडा येथून दोन, नंदुरबार उपनगर हद्दीतून एक तसेच धुळे जिल्ह्यातील सोनगीर व दोंडाईचा येथून प्रत्येकी एक तर इतर तीन अशा एकूण १२ दुचाकी लंपास केल्याचे सांगितले.
त्याच्यासोबत तीन अल्पवयीन साथीदार असल्याचेही त्याने सांगितल्याने त्यांचाही शोध सुरू आहे. चोरी केेलेल्या दुचाकी त्याने काढून दिल्याने त्या जप्त करण्यात आल्या आहेत.
ही कारवाई पोलीस अधीक्षक महेंद्र पंडित, अपर अधीक्षक विजय पवार यांच्या मार्गदर्शनाखाली एलसीबीचे निरीक्षक विजयसिंग राजपूत, हवालदार सजन वाघ, प्रमोद सोनवणे, पोलीस नाईक विकास अजगे, विजय धिवरे, किरण पावरा, सतीश घुले यांनी केली.