नंदुरबार : दुचाकीस्वाराला लुटणाऱ्या दोघांना एलसीबीने ताब्यात घेऊन त्यांच्याकडून मुद्देमाल जप्त केला. पुरुषोत्तमनगर-सावखेडा रस्त्यावर ही घटना घडली होती.
हर्षल प्रकाश कोळी (रा. गोपाळ नगर, शहादा) व छोटू भुऱ्या ठाकारे (रा. भवानी चौक शहादा) असे अटक करण्यात आलेल्या संशयितांची नावे आहेत. पोलीस सूत्रांनुसार, लोहित विजय खैरनार व त्यांचे मित्र निरज सुनील पाटील हे लोणखेड्याकडून असलोदकडे मोटारसायकलवरून जात होते. सातपुडा साखर कारखान्याच्या पुढे वळणावर मागून एका काळ्या रंगाच्या मोटारसायकलीवर आलेल्या दोघांनी त्यांना अडवून तुमच्यामुळे आमची गाडी स्लिप झाली असे सांगून दोन्ही व्यक्तींना शिवीगाळ करत जिवे मारण्याची धमकी दिली. त्यांच्या खिशातील २३ हजार रुपये किमतीचे दोन मोबाईल हॅन्डसेट जबरीने चोरून पळून गेले. याबाबत लोहित खैरनार यांच्या फिर्यादीवरून शहादा पोलीस ठाण्यात जबरी चोरीचा गुन्हा दाखल करण्यात आला.
भरदिवसा जबरी चोरीची घडलेली घटना गांभीर्याने घेऊन पोलीस अधीक्षक महेंद्र पंडित यांनी गुन्ह्याची पद्धत व घटनास्थळाया अभ्यासावरून आरोपी स्थानिक असल्याचा कयास व्यक्त केला. गुन्ह्याचा समांतर तपास करून गुन्हा उघडकीस आणण्याबाबत स्थानिक गुन्हे अन्वेषण शाखेचे पोलीस निरीक्षक विजयसिंग राजपूत यांना मार्गदर्शन केले.
राजपूत यांनी पथक स्थापन करीत तपास सुरू केला. संशयितांचा कोणताही मागमूस नसताना गुन्ह्याच्या घटनास्थळाच्या आजूबाजूच्या परिसरातील माहिती काढून व साक्षीदारांकडून प्राप्त माहितीवरून आणि बोलीभाषेवरून संभाव्य ठावठिकाण्यापर्यंत माग काढला. त्यानुसार हर्षल प्रकाश कोळी व छोटू भुऱ्या ठाकारे यांच्या हालचाली संशयित असल्याने दोघांना ते पळून जाण्याच्या बेतात असताना ताब्यात घेतले. चोरलेले २३ हजार रुपये किमतीचे दोन मोबाईल, गुन्हा करण्यासाठी वापरलेली पॅशन प्लस मोटारसायकल असा मुद्देमाल जप्त केला.
ही करवाई पोलीस अधीक्षक महेंद्र पंडित, अपर पोलीस अधीक्षक विजय पवार यांच्या मार्गदर्शनाखाली एलसीबीचे निरीक्षक विजयसिंह राजपूत, हवालदार दीपक गोरे, प्रमोद सोनवणे, विकास कापुरे, पुरुषोत्तम सोनार यांच्या पथकाने केली.