शहरातील मोकाट जनावरांसाठी नगरपालिकाने कोंडवाडा तयार करावा व जनावरांच्या मालकांवर दंडात्मक कारवाई करावी, अशी मागणी वाहनधारकांकडून करण्यात येत आहे. विशेषतः कळपाकळपाने फिरणारी ही जनावरे रस्त्यावर ठाण मांडून बसतात. त्यामुळे वाहतुकीला अडथळा निर्माण होतो. अनेकदा एखादे मोकाट जनावर फिरण्यासाठी आलेल्या नागरिकावर धावूनही जाते. त्यामुळे पळापळही होते. यातून अपघात होण्याचीही शक्यता नाकारता येत नाही. त्यात अनेकजण जखमी होतात. कोंडवडा नसल्यामुळे जनावर मालकांवर कुठलाही प्रकारचा धाक राहिलेला नाही.
शहरातील प्रमुख रस्ते, स्मारक, चौक व कॉलनीदेखील मोकाट कुत्र्यांची दहशत निर्माण झाली आहे. हे कुत्रेदेखील झुंडीने फिरतात. अनेक विद्यार्थी शिकवणीसाठी जात असतानाही त्यांच्या अंगावर धावून जात असतात. या मोकाट कुत्र्यांच्या दहशतीमुळे शिकवणीला जाण्यासाठी मुले आता घाबरायला लागली आहेत. त्यामुळे त्यांचे शैक्षणिक नुकसान होत आहे. यामुळे नागरिक अधिक धास्तवाले आहेत. मोकाट कुत्र्यांवर नगरपालिकाने निर्बिजीकरणाची मोहीम राबवून, प्रभावीपणे काम हाती घेतील, अशी अपेक्षा व्यक्त केली जात आहे.
वराहाच्या उपद्रवाने नागरिक हैराण
गेल्या काही दिवसांत वराहांच्या संख्येत लक्षणीय वाढ झाली असून, त्यांचा बंदोबस्त करण्याची मागणी परिसरातील नागरिकांनी केली आहे. अनेकवेळा ही जनावरे रस्त्यावर भटकंती करत असताना वाहनधारकांच्या समोर येत असल्याने अपघाताच्या घटना घडत असतात.