महिलांकडून घरगुती कामांना पसंती
नंदुरबार : लाॅकडाऊनमुळे सर्वच जण घरी आहेत. यातून महिलांकडून शेवया, पापड, कुरडया तयार करण्याच्या कामांना वेग दिला जात असल्याचे दिसून आले आहे. विवाह सोहळे तसेच बाहेरगावी जाण्यास बंदी असल्याने महिला घरीच राहून एकत्र येत या कामांना पसंती देत असल्याचे दिसून आले आहे. अनेक महिला ह्या वस्तू तयार करून त्यांची विक्री करत आहेत.
केंद्रांवर शुकशुकाट
नंदुरबार : शहरात आरोग्य विभागाने लावलेल्या रॅपिड ॲंटिजेन टेस्ट कॅम्प सध्या सुने आहेत. जागोजागी नियुक्त कर्मचारी दुपारी १२ वाजेपर्यंत बसून राहत असल्याचे दिसून आले आहे. शहरातील अनेकांना किरकोळ आजार किंवा लक्षणेही नसल्याने चाचण्या घटल्याची माहिती देण्यात आली आहे. हे शिबिर सुरू राहणार असल्याचे सांगण्यात आले.
गस्तीत वाढ करावी
नंदुरबार : शहरातील जगतापवाडी भागात रात्रीच्यावेळी पोलिसांनी गस्त वाढवण्याची मागणी करण्यात आली आहे. या भागात रात्रीच्यावेळी चोरटे फिरत असल्याचे सांगण्यात आले आहे. परिसरात इतर वसाहतींमधील घरे ही लांबवर असल्याने त्यांना सुरक्षा पुरवण्यासाठी गस्तीची गरज आहे.
जलसाठा घटला
तळोदा : तालुक्यातील रोझवा, धनपूर व इतर लघु प्रकल्पांमधील जलसाठा घटत आहे. उन्हाळ्यामुळे पाणी आटत असल्याचे सांगण्यात येत आहे. यातून मासेमारीत अडचणी येत असल्याची माहिती देण्यात आली आहे. दरम्यान या प्रकल्पांवर काही जणांकडून शेती कसली जात आहे.
ग्रामीण जनतेकडून साहित्य जुळवाजुळव
नंदुरबार : जिल्ह्याच्या विविध भागात पावसाळ्यापूर्वी घर दुरुस्तीची कामे सुरू आहेत. यासाठी प्लॅस्टिक कागद, काैले, पन्हाळी पत्रे तसेच इतर साहित्याला मागणी असते. परंतु दुकाने बंद असल्याने त्याची खरेदी करणे जमत नसल्याने नागरिक या वस्तूंची जुळवाजुळव करत आहेत. सोमवार ते गुरुवार सुरू राहणाऱ्या बाजारात भेटी देत या वस्तूंचा शोध घेण्यावर भर दिला जात आहे.
आंबा उत्पादक चिंतेत
नंदुरबार : शहरातील बाजारपेठ दोन दिवस बंद असल्याने ग्रामीण भागातील आंबा उत्पादकांना फटका बसत आहे. यामुळे आंब्याची आवकच झालेली नसल्याचे चित्र आहे. ग्रामीण भागातील महिला शेतशिवारातील बांधावरच्या गावराणी कैऱ्या तोडून त्यांना सेंद्रिय पद्धतीने तयार करुन आणतात.
लसीकरणाला गती
धडगाव : तालुक्यातील विविध भागात सध्या लसीकरणाच्या कामांना गती देण्यात आली आहे. यातून गाव पाड्यांवर शिबिरे घेत आहेत. अक्कलकुवा तालुक्यातील गावांमध्ये विक्रमी शिबिरे झाल्याने धडगाव तालुक्यातही हे विक्रम होतील, अशी अपेक्षा असून त्यादृष्टीने नियोजन सुरू आहे.
गतिरोधकांची गरज
नंदुरबार : शहरातील धुळे बायपास रोडवर करण चाैफुली ते होळ फाटा उड्डाणपूल या दरम्यान गतिरोधकांची गरज आहे. मार्गावर दिवसेंदिवस वाहतूक वाढत आहे. सोबत दोन्ही बाजूस रहिवासी वसाहती आहेत. यातून मार्गावर अपघात घडण्याची भीती असल्याने कारवाईची मागणी होत आहे.
दुपारी पळापळ
नंदुरबार : शहरातील विविध भागात रविवारी दुपारी कोणतेही काम नसताना फिरणाऱ्या दुचाकीस्वारांवर कारवाई सुरू होती. यातून पोलीस पथक दिसल्यानंतर लांबूनच वाहने वळवून अनेक जण पळापळी करत असल्याचे दिसून आले. गांधी पुतळा व हाट दरवाजा भागात ही कारवाई सुरू होती.