नवापूर : शहरातील प्रभाग क्रमांक सहा व सातमधील रस्त्याच्या डांबरीकरणाचे काम चांगलेच चर्चेत आले होते. एकाच रस्त्याचे दोन वेळा उद्घाटन, सत्ताधारी व विरोधकांचे आरोप - प्रत्यारोप, सोशल मीडियावर डांबरीकरणाचे फोटो व व्हिडिओ व्हायरल, अशा कारणाने नवापूर शहरातील बहुचर्चित डांबरीकरणाचे काम अखेर नगरसेवक, पालिका प्रशासन व ठेकेदाराने चांगले करून दाखवले. यात खऱ्या अर्थाने लोकशाहीचा विजय झाल्याचे दिसून येते. महानगरातील रस्त्यांना लाजवेल असा रस्ता नवापूर शहरात प्रथमच करण्यात आला आहे, असे रस्ते नेहमी तयार करण्यात यावे.
शहरातील प्रभाग सहा व सातमधील ५६ लाख रुपये खर्चाच्या ७५० मीटरच्या रस्त्यांचे डांबरीकरणाचे काम निकृष्ट दर्जाचे होत असल्याचा आरोप स्थानिक नागरिकांनी केला होता. त्यामुळे हे काम बंद करण्यात आले. परंतु काही महिन्यांच्या प्रतीक्षेनंतर रखडलेले डांबरीकरणाचे काम पुन्हा सुरू करण्यात आले. यावेळी प्रभाग सहा व सातमधील डांबरीकरणाचे काम नागरिकांच्या मागणीनुसार स्थानिक नगरसेवकांच्या सूचनेप्रमाणे व प्रशासनाच्या हस्तक्षेपाने पूर्ण करण्यात आल्याने नागरिकांनी समाधान व्यक्त केले. तसेच नगर पालिकेच्या नगराध्यक्षा हेमलता पाटील, शिवसेना नगरसेविका अरूणा पाटील, नगरसेवक तथा बांधकाम सभापती आरिफ बलेसरीया, सुरेखा जगदाळे, ठेकेदार चुन्नीलाल पाटील, नगरसेवक महेंद्र दुसाने यांचे स्थानिक नागरिकांनी आभार मानले.
नवापूर शहरात निकृष्ट दर्जाचे काम करणाऱ्या ठेकेदारांना काळ्या यादीत टाकून अशा पद्धतीने रस्त्याचे काम करणाऱ्या ठेकेदारांना विकासकामांचा ठेका देण्यात यावा, अशी मागणी स्थानिकांनी केली आहे.
नवनीत लोहार यांच्या घरापासून कुंभारवाडापर्यंत हा रस्ता वर्दळीचा व महत्वपूर्ण असल्यामुळे या रस्त्याचे काम चांगले गाजले होते. त्याचे राजकारणदेखील मोठ्या प्रमाणात झाले. नगर पालिका असो की ग्रामपंचायत परिसरातील नागरिक जागरूक राहिले तर कोणीही विकासकामे निकृष्ट दर्जाचे करू शकत नाही, याची प्रचिती या डांबरीकरण रस्त्यातून आली. आपल्या शहरात, गावात किंवा प्रभागात खराब विकास कामे होत असल्यास नागरिकांनी त्याला जोरदार विरोध करणे गरजेचे आहे. तरच दर्जेदार काम होईल अन्यथा काही दिवसात रस्ते उघडून त्याचा मनस्ताप नागरिकांनाच सहन करावा लागणार आहे. त्यामुळे नागरिकांनी विकासकामांवर लक्ष ठेवणे गरजेचे आहे.
नवापूर शहरात विकासात्मक कामे नगर पालिकाअंतर्गत केली जात आहेत. सर्वच कामे चांगल्या पद्धतीने करण्याचा प्रयत्न नगर पालिका करीत आहे. साडेसहा कोटी रुपये खर्चाच्या विकासकामांना आमदार शिरीष नाईक यांनी निधी उपलब्ध करून दिला आहे. त्या अनुषंगाने नवापूर शहराचा विकास केला जाईल. तसेच शहरातील सर्वच रस्ते दर्जेदार केले जातील. - हेमलता पाटील, नगर पालिका, नगराध्यक्षा
नागरिकांचे समाधान हेच आमचे समाधान आहे.
छत्रपती शिवाजी रोड हा नागरिकांनी दिलेल्या सूचनेनुसार तयार करण्यात आला आहे. नागरिकांचे समाधान हेच आमचे समाधान आहे. प्रभाग क्रमांक सात व सहामधील रस्त्याचे डांबरीकरण करण्यात आले असून, पावसाळ्यात छतावरील पाणी रस्त्यावर पडून रस्ता खराब होऊ शकतो. त्या अनुषंगाने पाईप लावून छतावरील पाणी काढणे गरजेचे आहे. - अरूणा पाटील, शिवसेना नगरसेविका, नवापूर
नवापूर नगर पालिका शहरातील बांधकाम मजबूत करण्याचा प्रयत्न करीत आहे. आमदार शिरीषकुमार नाईक यांच्या प्रयत्नाने नवापूर शहरात विकासकामांना गती मिळाली आहे. मोठ्या प्रमाणात विकासकामे केली जाणार आहेत. नागरिकांच्या अपेक्षेप्रमाणे प्रभाग सहामधील डांबरीकरण केले आहे. - आरिफ बलेसरीया, नगर पालिका बांधकाम सभापती
सुरूवातीला आमच्या प्रभागातील डांबरीकरणाचे काम निकृष्ट दर्जाचे होते. त्या अनुषंगाने आम्ही नागरिकांनी विरोध केल्याने नगर पालिका प्रशासन, पदाधिकारी आणि ठेकेदार यांनी दखल घेऊन तत्काळ रस्त्याचे काम चांगल्या पद्धतीने केले. अशाच पद्धतीने नवापूर शहरातील सर्व रस्ते तयार करावे, जेणेकरून नागरिक व पालिका प्रशासनामध्ये संघर्ष होणार नाही. रस्ता चांगला केल्याने नगरसेवक आणि पालिका प्रशासनाचे आभार. - विजय लोहार, नागरिक नवापूर
नवापूर नगर पालिकेने ५६ लाखांच्या रस्त्याचे काम आम्हाला दिले होते. त्या अनुषंगाने रस्ता चांगला व दर्जेदार करण्याचा प्रयत्न केलेला आहे. जनहितार्थ काही वाढीव कामदेखील केले आहे. रस्त्यावर रेडियम पट्टे, रिफ्लेक्टर लाईट लावून चांगला रस्ता तयार करून दिल्याने नागरिक समाधानी आहेत. -चुनीलाल पाटील, ठेकेदार, नवापूर