पदभार घेतल्यानंतर सहा कर्मचाऱ्यांवर वेतन कपातीची कारवाई

राज्यात उद्‌भवलेल्या कोरोनाच्या पार्श्वभूमीवर अनुसूचित जमातीच्या कुटुंबांना सहाय्य करण्यासाठी खावटी अनुदान योजना राबवली जात आहे. तळोदा प्रकल्प कार्यालया अंतर्गत या योजनेच्या अंमलबजावणीसाठी कामकाजाला गती देण्यात आली आहे. प्रकल्प कार्यालयात सुरु असणाऱ्या खावटीसंबधी ऑनलाईन फॉर्म भरणे, प्रकल्प अधिकारी लेव्हलला फॉर्म ॲप्रुव्हल करणे, फॉर्म संपादीत करणे इत्यादी कामांसाठी प्रकल्प कार्यालयाच्या आस्थापनेवर कार्यरत असणारे अधिकारी व कर्मचारी यांना नियुक्ती करण्याचे आदेश व्हिडिओ कॉन्फरसींगद्वारे झालेल्या बैठकीत देण्यात आले होते. त्यानुसार प्रकल्प कार्यालयांकडून नियोजन करून तीन शिफ्ट कर्मचाऱ्यांची नियुक्ती नियुक्ती करण्यात आली होती. सकाळी सहा ते दोनच्या शिफ्टच्या कामात २५ तर दुपारी दोन ते रात्री १० साठी १८ कर्मचारी, रात्री १० ते सकाळी सहादरम्यान १३ कर्मचायांची नियुक्ती करण्यात आली होती. एका कर्मचाऱ्याला दिवसभरात ७०० फॉर्मचे उद्दिष्ट देण्यात आले होते. रात्रीच्या शिफ्ट असणाऱ्या कर्मचाऱ्यांनी दिवसभरात ७०० फार्म करण्याची त्यांना सवलत देण्यात आली होती. या कामकाजासाठी नियुक्त असणाऱ्या कर्मचाऱ्यांपैकी शुक्रवारी सहा कर्मचारी गैरहजर असल्याचे प्रकल्प अधिकारी मीना यांच्या लक्षात आले. गैरहजर असणाऱ्या कर्मचाऱ्यांवर एक दिवसाचे वेतन कपातीची कारवाई करण्याचे आदेश प्रकल्प अधिकारी विकास मीना यांनी बजावले आहेत. या कामात गैरहजर असणाऱ्या कर्मचाऱ्यांवर अशा प्रकारची कारवाई केली जाईल, असे पूर्वीच स्पष्ट करण्यात आले होते. तरीदेखील कर्मचारी गैरहजर राहिल्याने त्यांच्यावर कारवाई करण्यात आल्याचे सांगितले जात आहे. पहिल्या दिवशी प्रकल्प अधिकारी विकास मीना यांनी धडक कारवाई करत प्रकल्प कार्यालयाच्या कामकाजात कुठल्याही प्रकारची हलगर्जीपणा व चालढकल सहन केली जाणार नसल्याचे स्पष्ट संकेत दिले आहेत.