बिबट्याच्या हल्ल्यात मृत बालकाच्या वारसांना १५ लाखांची मदत

गौऱ्या, ता. धडगाव येथील रूपसिंग हावल्या पराडके हे ऊसतोडीसाठी डिसेंबर २०१८ मध्ये धूरखेडा, ता. शहादा येथे ऊसतोडणीसाठी गेले होते. कृष्णा भगवान पाटील यांच्या शेतात ऊसतोडणी सुरू असताना मुलगा तुषार रूपसिंग पराडके याच्यावर बिबट्याने हल्ला केला होता. यातून तुषार हा जखमी झाला होता. त्याचा फेब्रुवारी २०१९ मध्ये मृत्यू झाला होता. वन्य प्राण्याच्या हल्ल्यात मृत्यू झाल्याने तुषार याच्या आई-वडिलांना वनविभागाकडून मदत मिळणे अपेक्षित होते. यासाठी पाठपुरावा सुरू होता. यानुसार उपवनसंरक्षक एस.बी. केवटे, सहायक वनसंरक्षक धनंजय पवार, वन परिश्रेत्र अधिकारी एस.के. खुणे यांच्या मार्गदर्शनात रूपसिंग पराडके यांना १५ लाख रुपयांची मदत देण्यात आली. यांतर्गत धडगाव वनविभाग कार्यालयात बोलावून त्यांना तीन लाख रुपयांचा धनादेश देण्यात आला. तर उर्वरित १२ लाख रुपये हे बँकेत मुदत ठेव म्हणून ठेवत दर महिन्याला पराडके दांपत्याला दरमहा व्याज मिळेल, अशी तरतूद करण्यात आली. यावेळी वनपाल एस.एस. इंदवे, वनरक्षक बादशाह पिंजारी, संजय वाघ, शकील मणियार आदी उपस्थित होते.