शेतीच्या उत्पादनात वाढ करणे, पारंपरिक पिकांबरोबरच फळबाग लागवडीखालील क्षेत्रफळात वाढ करणे, फळबाग लागवडीसाठी शेतकऱ्यांना प्रोत्साहित करणे आदी उद्देशातून रोहयो अंतर्गत फळबाग लागवड केली जाते. २०२०-२१ या वर्षात शहादा तालुक्यातील ४८० हेक्टर क्षेत्रफळावर फळबाग लागवड करण्याचे उद्दिष्ट देण्यात आले होते. त्यात आतापर्यंत ४२१ शेतकरी तसेच ४१८.४९ हेक्टर लागवड क्षेत्र निवडण्यात आले. यापैकी ५६३.०३ हेक्टर क्षेत्रावरील लागवड प्रस्तावाला तांत्रिक तर ५६३.०३ हेक्टरवरील प्रस्तावाला प्रशासकीय मान्यता मिळाली आहे. त्यात ४२१ शेतकऱ्यांनी ४१८.४९ हेक्टरवर फळबाग लागवड केली. आंबा कलमे, काजू, चिकू कलमे, पेरू कलमे, डाळिंब कलमे, आंबा रोपे, मोसंबी, लिंबू, चिंच रोपे, सीताफळ रोपे, आवळा रोपे, बोर रोपे, बांबू रोपे, औषधी वनस्पती आदी फळ लागवडीचा समावेश आहे. शहादा तालुक्यात सर्वाधिक पसंती आंबा कलमाला दिली आहे. त्यात २६९ शेतकऱ्यांनी लाभ घेतला तर पेरू कलमासाठी ४३ शेतकरी, कागदी लिंबू ७४ शेतकरी, सीताफळ रोपे २५ शेतकरी, बांबू रोपे चार शेतकऱ्यांनी लाभ घेतला.
मंडळनिहाय उद्दिष्टे
शहादा तालुक्यात एकूण चार मंडळ आहेत. त्यात शहादा मंडळाला १२० हेक्टर फळलागवडीचे उद्दिष्ट देण्यात आले होते. त्यात ६०.२८ हेक्टर फळबाग लागवड करण्यात आली. म्हसावद मंडळात १२० हेक्टर उद्दिष्टापैकी १०५.७२ हेक्टर लागवड करण्यात आले. मंदाणे मंडळात १२० हेक्टरपैकी अधिकची १४६.४२ लागवड करण्यात आली. कळंबू मंडळात १२० हेक्टरपैकी १०४.०७ हेक्टर फळबाग लागवड करण्यात आल्याची माहिती शहादा तालुका कृषी अधिकारी किशोर हडपे यांनी दिली.
शेतकऱ्यांनी पारंपरिक शेतीसोबतच फळबाग लागवडीकडे वळावे. जेणेकरून आर्थिक उत्पन्नात दुसरा शोध तयार करता येईल. मागील वर्षी २०१ हेक्टर उद्दिष्ट देण्यात आले होते. त्याहून अधिक २२७ हेक्टर फळबाग लागवड करण्यात आली होती. यावर्षी ४८० हेक्टर उद्दिष्ट देण्यात आले होते. त्यासाठी शेतकऱ्यांमध्ये जनजागृती करून फळबागेचे महत्त्व पटवून उद्दिष्ट पूर्ण करण्यात आले असून शेतकऱ्यांना लाभ मिळवून देण्यात आला आहे.
-किशोर हडपे, तालुका कृषी अधिकारी, शहादा.