शहादा तालुक्यातील सारंगखेडा प्राथमिक आरोग्य केंद्रअंतर्गत सहा आरोग्य उपकेंद्रे संलग्न असून बहुतांश गावे आदिवासी बहुल वस्तीची आहेत. कार्यक्षेत्रात पंधरा गावे, सात आरोग्य उपकेंद्रे, ३०.००० च्या वर लोकसंख्या आहे. परंतु या प्राथमिक आरोग्य केंद्रांत मंजूर केलेल्या ३८ पैकी १५ पदे रिक्त असल्याने अडचणी येत आहेत. केवळ ११ पदेच कार्यरत असतानाही त्यांच्याकडून कामकाज सुरू आहे. आरोग्य केंद्रात आरोग्य सहायक, साहाय्यिका, कंत्राटी जीएनएम, परिचर, कंत्राटी आरोग्यसेविका, स्विपर, वाहनचालक यांची प्रत्येकी एक, तर चार आरोग्यसेविका आणि दोन आरोग्यसेवक अशी १५ पदे रिक्त आहेत.
सध्या नियुक्त असलेल्या कर्मचाऱ्यांपैकी काही काही कर्मचारी कोविड प्रतिबंधात्मक लसीकरण, स्वॅब कलेक्शन सर्वेक्षण यांसाठी जात आहेत. यात काहींना मोहिदा व सारंगखेडा येथील विलगीकरण कक्षात ड्यूटीसाठी पाठवण्यात येत आहे. हे कर्तव्य बजावत असताना काही स्वत: तर काहींच्या कुटुंबात कोणीतरी हमखास आजारी असतानाही त्यांच्याकडून कर्तव्य बजावण्यात येत आहे. गेल्या दीड महिन्यात कार्यक्षेत्रातील १५० च्या वर कोरोनाबाधित रुग्ण निघाले. त्यात दुर्दैवाने काही मृत झाले व १२० पेक्षा जास्त रुग्ण कोरोनामुक्त होत घरी परतले; तर काही उपचार घेत आहेत; त्यामुळे आता सारंगखेडासह परिसरातील रुग्णसंख्या ओसरली असली तरी ग्रामस्थांनी शासकीय नियम पाळावेत असे आवाहन करण्यात येत आहे. वैद्यकीय अधिकारी डॉ. कांतीलाल पावरा, डॉ. किशोर पाटील, प्रयोगशाळा वैज्ञानिक अधिकारी सी. एम. पाटील, औषधनिर्माण अधिकारी एम. बी. परदेशी, आरोग्य सहायक आर. आर. महीरे हे या ठिकाणी सध्या सेवा देत आहेत. सद्य:स्थितीत एकूण कायमस्वरूपी व कंत्राटी आरोग्य कर्मचारी मिळून २३ पैकी ११ कर्मचारी वेगवेगळ्या ठिकाणी प्रतिनियुक्तीवर आहेत.