मन्यार
या सापाचे विष दंत लांबी फार लहान असते. त्याचे विष नागाच्या विषापेक्षा तीव्र व जहाल असते. या सापाचा निळसर काळा रंग, त्यावर पांढरे आडवे पट्टे शेपटी पासून सुरू होतात व डोक्याकडे ठिपके होत येतात. हा खूपच शांत स्वभावाचा साप आहे. मन्यार सापाचे विष मज्जातंतूवर परिणाम करते.
घोणस
या सापावर तपकिरी रंगावर गोल काळ्या ठिपक्यांच्या तीन रांगा असतात. शरीराने अजगर प्रमाणे जाडजूड, सुमारे चार ते पाच फूट लांब असतो. हा ३० ते ४० पिलांना जन्म देतो. चिडल्यास कुकरच्या शिटी प्रमाणे आवाज काढतो. या सापाचे विष दंत लांब असतात. सर्पदंश झालेल्या जागी तीव्र वेदना सुरू होऊन दंश भोवतालचा भाग सुजू लागतो.
नाग
नागाची ओळखण्याची सर्वात मोठी खुण म्हणजे त्याचा फणा. नागाच्या डोक्यामागील काही बरगड्या अतिशय लवचीक असतात. त्यामुळे नागाला फणा काढणे शक्य होते. नागांना फण्याच्या मागील बाजूस १० चा आकडा असू शकतो. गव्हाळी फिकट, काळा रंग व तपकिरी रंगातील नाग जास्त आढळतात.
फुरसे
फुरसे एक ते दीड फुटापर्यंत लांबी असलेला साप आहे. याचा रंग गडद तपकिरी असतो. पाठीच्या दोन्ही बाजूस एकेक फिकट पांढरी नागमोडी रेषा असते. हा चिडल्यावर शरीराचा आकार एस प्रमाणे करुन विशिष्ट प्रकारचा आवाज करतो. याचे विष दंत फार लांब असतात. त्यांच्या विषात रक्ताच्या गाठी करण्याची क्षमता असून विष फार घातक आहे.