सध्या वाहनांची वाहतूक पोलिसांकडून कसून चौकशी होत असल्याने गेल्या वर्षभरापासून कोरोना महामारीमुळे जिल्हा व तालुकास्तरावरील कार्यालयीन कामे अनेक वेळा स्थगित करण्यात आल्याने वाहन परवाने वितरण करणे बंद झाले होते. वाहन परवाने न मिळाल्यामुळे प्रशासकीय चौकशीला सामोरे जावे लागत आहे. पात्रता असताना वाहन परवाना मिळवण्यासाठी जिल्ह्याच्या ठिकाणी वांरवार चकरा माराव्या लागत असल्याने दुुर्गम भागातील वाहनधारकांतून संतप्त भावना व्यक्त होत आहेत.
सातपुड्याच्या डोंगराळ भागातील दुर्गम, अतिदुर्गम भागातील वाहनधारकांना वाहने चालविणे व नियमांची माहिती मिळावी आणि परवाना मिळावा ह्या उद्देशाने उपप्रादेशिक परिवहन नंदुरबार कार्यालयातर्फे तालुकास्तरावर शिबिर घेण्यात येत होते. मात्र, हे शिबिर मार्च महिन्यापासून बंद असल्याने सातपुड्याच्या डोंगराळ भागातील दुर्गम, अतिदुर्गम भागातील वाहनधारकांना परवाना मिळवण्यासाठी नंदुरबार प्रादेशिक परिवहन कार्यालयात चकरा माराव्या लागत असल्याने गैरसोयीचे व त्रासदायक झाले आहे. तरी तालुकास्तरावर नियमांची माहिती मिळावी आणि परवाना देण्यासाठी शासनाकडून तळोदा, शहादा, धडगांव, नवापूर अशी तालुकास्तरीय शिबिर सुरू करण्यात यावीत अशी मागणी वाहनधांरकांकडून करण्यात येत आहे.
तालुकास्तरावरीय वाहन परवाना शिबिर बंद असल्याने जिल्हा मुख्य कार्यालयात जावे लागते. येण्यासाठी जास्तीचे अंतर होत असल्याने नाहक मनस्ताप सहन करावा लागत आहे. त्यामुळे तालुकास्तरावरील तळोदा येथे परवाना शिबिर सुरू करण्यात यावे.
-वैभव पाडवी, वाण्याविहीर