कोविड-१९मुळे ग्रामीण भागातील बससेवा बंद करण्यात आल्या होत्या. त्यामुळे मोलगी परिसरातील प्रवाशांना खासगी प्रवासी वाहनाचा आधार घेत मोलगी-अक्कलकुवा येथे दैनंदिन कामकाजासाठी यावे लागत असल्याने त्यांना गैरसोयीचे व त्रासदायक झाले आहे. त्यामुळे संबंधित वरिष्ठ अधिकाऱ्यांनी याकडे गांभीर्याने लक्ष देऊन या भागातील बससेवा पूर्ववत सुरू करावी, अशी अपेक्षा प्रवाशीवर्गांकडून व्यक्त केली जात आहे.
आमलीबारी, देवगोई, डाब, मोलगी, जमाना, धडगांव, भगदरी, पिपळखुटा, वडफळी या परिसरात अक्कलकुवा आगाराने बस सुरू करण्याची मागणी होत आहे.
अक्कलकुवा तालुक्यातील आमलीबारी, देवगोई, डाब या घाट सेक्शन रस्त्याच्या कामामुळेदेखील हा मार्ग वाहतुकीसाठी बंद करण्यात आला होता. त्यामुळे या मार्गावरून ये-जा करणाऱ्या बसेस बंद होत्या. मात्र, आता आमलीबारी, देवगोई व डाब या रस्त्यांचे काम पूर्णत्वाकडे असल्याने मोठी वाहने या मार्गावर सुरू झाल्या आहेत. त्यामुळे अक्कलकुवा आगारातून आमलीबारी, देवगोई, डाब, मोलगी, जमाना, धडगांव , भगदरी, पिपळखुटा, वडफळी या मार्गावरील बसेस सुरू करून नागरिकांची होणारी गैरसोय तत्काळ दूर करावी, अशी अपेक्षा व्यक्त होत आहे. या परिसरातील विद्यार्थ्यांना शिक्षणासाठी तालुक्याच्या ठिकाणी वेळेत पोहोचण्याकरिता बस सोयीची ठरत असते.
या आगारातून नंदुरबार, तळोदाच्या फेऱ्या वाढविण्याची गरज आहे. या मार्गावर प्रवासी बसची तासन्तास प्रतीक्षा करीत असतात. मात्र, वेळेवर बस मिळत नसल्याने इतर खासगी वाहनाचा आधार घ्यावा लागत आहे. त्यामुळे संबंधितांनी याकडे गांभीर्याने लक्ष देऊन बसफेऱ्यात वाढ करण्याची गरज आहे.
दरम्यान, आमलीबारी, देवगोई, डाब मार्गे मोलगी, जमाना, धडगाव या घाट सेक्शनच्या मार्गावर मिनी बस सुरू करण्याची गरज मागणी मोलगी भाजपा शहराध्यक्ष सुनील राहसे यांनी आगारप्रमुखांकडे दिलेल्या निवेदनाद्वारे केली आहे.
सकाळी सहा वाजता अक्कलकुवा-डाब, मोलगी मार्गे धडगांव, साडेआठ वाजता भगदरी, सकाळी नऊ वाजता अक्कलकुवा-डाब, जमाना मार्गे, १० वाजता अक्कलकुवा मोलगी मार्गे पिपळखुटा, दुपारी चार वाजता अक्कलकुवा-मोलगी, पिपळखुटा मार्गे वडफळी, तसेच धडगांव येथून दुपारी चार वाजता मोलगी, अक्कलकुवा-नंदुरबार सुरू करावी, अशी मागणी शिक्षक, आरोग्य विभागासह नोकरी निमित्ताने ये-जा करणाऱ्या प्रवाशीवर्गांकडून करण्यात येत आहे. दरम्यान, साडेपाच वाजेनंतर अक्कलकुवा येथून नंदुरबारकडे जाण्यासाठी बस नसल्याने गैरसोयीचे होते. त्यामुळे संध्याकाळी सहा वाजता नंदुरबारसाठी बस सुरू करण्याची गरज आहे. -सुनील राहसे, भाजपा शहराध्यक्ष, मोलगी.