नंदुरबार : शहरासह ग्रामीण हद्दीतील विविध भागात बांधकामे सुरू आहेत. या ठिकाणी येणाऱ्या मजुरांना कोरोनाबाबत मार्गदर्शन करून उपाययोजनांवर भर देण्याची गरज आहे. या कामगारांचे लसीकरणही झालेले नसल्याची माहिती देण्यात येत असून, प्रशासनाने बांधकाम कामगारांना वेगळ्या गटात समाविष्ट करून लसीकरण करण्याची मागणी आहे.
ग्रामीण हद्दीत सुरळीत वीज पुरवठा करावा
नंदुरबार : शहरालगतच्या होळतर्फे हवेली, वाघोदा, पातोंडा या भागात वीज पुरवठा सुरळीत ठेवण्याची मागणी आहे. वीज पुरवठ्याअभावी या भागातील नागरिक त्रस्त झाले आहेत. रात्रीच्यावेळी तसेच दिवसा वीज पुरवठा खंडित होण्याचे प्रकार वाढल्याचे सांगण्यात आले आहे.
चार वाजेनंतर होतोय शुकशुकाट
तळोदा : प्रशासनाकडून देण्यात आलेल्या आदेशानुसार सध्या तळोदा शहरात दुपारी चारवाजेपर्यंत विविध दुकाने सुरू ठेवण्यात येत आहेत. चार वाजेनंतर सर्व व्यवहार बंद होत असल्याने शहरात शुकशुकाट पसरत आहे. केवळ अत्यावश्यक सेवा सुरू ठेवण्यात येत असल्याने नागरिकांची सोय होत आहे. दरम्यान चार वाजेपर्यंतच्या व्यवहारांमुळे ग्रामीण भागातून येणाऱ्या ग्राहकांची तारांबळ उडत आहे.
भूजल पातळी खालावल्याने चिंता
बोरद : तळोदा तालुक्यातील शेतशिवारात विहिरी व कृषीपंपांची भूजल पातळी खालावली आहे. यामुळे शेतकऱ्यांना पिकांना पाणी देण्यास अडचणी येत आहेत. पाणी कमी मिळत असल्याने बागायती पिकांचे नुकसान होत असल्याचे शेतकरी सांगत आहेत.
कृषी विभागाने मार्गदर्शन करावे
धडगाव : दुर्गम भागात तुरळक पावसाच्या बळावर पेरण्या सुरू झाल्या आहेत. बहुतांश शेतकरी ज्वारीची पेरणी करत आहेत. दरम्यान, शेतकऱ्यांची बोगस बियाणे देऊन फसवणूक होण्याची शक्यता आहे. यामुळे कृषी विभागाने बियाणे मार्गदर्शनाची अपेक्षा आहे.
शेतकऱ्यांना वन विभागाने भरपाई द्यावी
बोरद : तळोदा तालुक्यातील विविध भागात बिबट्याच्या हल्ल्यात पशुपालकांच्या जनावरांचा बळी जात आहे. यामुळे पशुपालकांना मोठा आर्थिक फटका बसत आहे. यातून सावरण्यासाठी वन विभागाने पशुपालकांना शेळ्या तसेच गुरांची नुकसान भरपाई देण्याची मागणी आहे. वन विभागाकडून याबाबत तरतूद करण्यात येते; परंतु तळोदा तालुक्यात ही भरपाई उशिराने मिळत असल्याचे सांगण्यात आले आहे.
रस्ता सुरू करावा
अक्कलकुवा : मोलगी ते अक्कलकुवा दरम्यान रस्ता काम सध्या वेगात सुरू आहे. हे काम पूर्ण होत आल्याने प्रवासी वाहनांना परवानगी द्यावी, अशी मागणी करण्यात आली आहे. मोलगीपर्यंत जाण्यासाठी दुसरा मार्ग अवलंबावा लागत असल्याने वाहनधारक हैराण झाले आहेत.
पावसाची प्रतीक्षा
शहादा : शहर व परिसरात दमदार पावसाची प्रतीक्षा आहे. तालुक्यातील विविध भागात अद्यापही मुसळधार पावसाने हजेरी लावलेली नाही. यामुळे शेतीकामे रखडली आहेत. पाऊस नसल्याने वातावरणातील उष्मा नागरिकांना हैराण करणारा ठरत असल्याचे दिसून येत आहे.
भाजीपाला बाजारात वांग्यांची आवक
नंदुरबार : भाजी बाजारात पालेभाज्यांसोबत वांग्यांची मोठी आवक होत आहे. बाजारात गेल्या चार दिवसात सातत्याने वांगी विक्रीसाठी आणली जात आहेत. यामुळे किरकोळ बाजारात वांग्यांचे दरही कमी झाल्याचे भाजीपाला विक्रेत्यांकडून सांगण्यात आले.
हंगामी व्यवसायांवर होतोय परिणाम
नंदुरबार : पावसाळा सुरू झाला असला तरी शहरात मुसळधार अशा पावसाने हजेरी लावलेली नाही. परिणामी, छत्र्यांची विक्री तसेच रेनकोट विक्री करणाऱ्यांचे व्यवसाय ठप्प आहेत. पाऊस बरसत नसल्याने नागरिकांकडून या वस्तूंची खरेदीच झालेली नाही.