या वेळी आमदार शिरीषकुमार नाईक यांनी नवापूर शहरातील सुधारित ५४ कोटींची पाणीपुरवठा योजना मंजुरी मिळण्याबाबत पाठपुरावा करण्याबाबत आश्वासन दिले. यानंतर शहरातील स्वस्तिक मिल जवळील फरशी पुलावर नवीन मोठा पूल बांधणे तसेच सार्वजनिक बांधकाम विभागाजवळील रंगावली नदीवरील पूल बांधणेबाबत निधी मंजूर करण्यात येईल. तसेच शहराला पाणीपुरवठा करण्यात येणाऱ्या पंप हाऊस येथे रंगावली नदीवर नवीन केटिवेअर बांधकाम करणे कामी जलसंपदा विभागाकडून आवश्यक निधी प्राप्त करून घेण्यात येईल. तसेच शहरातील जवळपास आठ ते १० मुख्य रस्ते नवीन करणे कामी शासनाचा रस्ता निधी व वैशिष्ट्यपूर्ण योजनेतून निधी प्राप्त करण्यात येईल.
शहरातील मुख्य नेहरू उद्यान, नाना -नानी पार्क तसेच रहिवास विभागातील खुल्या जागांना कंपाऊड करून त्या विकसित करण्यात येतील. नवापूर शहरातील प्रत्येक प्रभागात आवश्यक त्या ठिकाणी जिम साहित्य बसविण्यात येतील. तसेच देवलफळी महामार्ग पुलापासून ते केटिवेअरपर्यंत संरक्षक भिंत विकसित करण्यात येईल. नगरपरिषदेतील रिक्त पदांबाबत शासन स्तरावर पाठपुरावा करुन संवर्ग कर्मचारी व नगरपरिषद कर्मचारी यांची शासन मंजुरीने भरती करण्यात येईल. नागरी आदिवासी वस्तीसुधार योजनांतर्गत आदिवासी प्रभागात विविध विकास कामासाठी जवळ पास दोन कोटी रुपये मंजूर करणेकामी पाठपुरावा करण्यात येईल. शहरातील एकमेव दिगंबराव पाडवी क्रिक्रेट ग्राऊंड तसेच क्रीडासंकुल विकसित करणे कामी शासन स्तरावर पाठपुरावा करण्यात येईल, अशी माहिती आमदार शिरीष नाईक यांनी उपस्थित नगरसेवक-नगरसेविका यांना दिली. या आढावा बैठकीत आमदार शिरीष नाईक यांचा सत्कार नगराध्यक्षा हेमलता पाटील यांनी केला. या वेळी नवापूर नगरपालिकेचे मुख्यधिकारी महेश चौधरी, प्रशासकीय अधिकारी अनिल सोनार, पाणीपुरवठा अभियंता सचिन अग्रवाल उपस्थित होते.
उन्हाळ्यात पाणीटंचाई होणार नाही
रंगावली धरणापासून नवापूर शहरापर्यंत पाईपलाईन बसवल्याने नवापूर शहराचा पिण्याचा पाण्याचा प्रश्न कायमस्वरूपी मिटणार आहे. भीषण पाणीटंचाई मे अखेर निर्माण होते. त्यावेळेस नगरपालिकेला लाखो रुपये खर्च करून आवर्तने मागवावी लागतात. पाईप लाईन केल्याने पाण्याची बचत व उपलब्धता वाढणार आहे. यामुळे नगरपालिकेचा खर्चदेखील कमी होईल.
नवापूर विधानसभा मतदारसंघामध्ये ग्रामीण भागात विविध योजनेच्या माध्यमातून अनेक विकास कामे करण्यात आली आहे. त्याच पद्धतीने नवापूर शहरातदेखील नगरपालिका अंतर्गत येणाऱ्या शहराचा विकास मोठ्या प्रमाणात करण्यात येईल. त्यासाठी नियोजन करण्यात आले असून, लवकरच विकास कामांना शुभारंभ होईल. -शिरीष कुमार नाईक आमदार नवापूर
नवापूर शहराला स्वच्छ व सुंदर नगरी बनवण्याचा मानस असून, काँग्रेस पक्षाचे आमदार शिरीष नाईक मोठ्या प्रमाणात नगरपालिका प्रशासनाला विविध विभागातून निधी उपलब्ध करून देणार आहेत. या निधीतून शहराचा विकास करण्यात येणार असून, यातून नवापूर शहराचा विकास करण्यात येईल. - हेमलता पाटील, नगराध्यक्षा न.पा नवापूर