जिल्ह्यातील विविध भागात गेल्या काही वर्षात यांत्रिकी शेतीला प्राधान्य दिले जात आहे. यातून ट्रॅक्टरच्या आधारे शेतमशागत करण्यात येते. यातून अनेकांनी ट्रॅक्टर खरेदी करून घेत भाडोत्री पद्धतीने शेतमशागत करण्याचा व्यवसाय ग्रामीण भागात सुरू केला होता. यात बेरोजगार युवकांना मोठा लाभ झाला. दिवसेंदिवस वृद्धिंगत होणाऱ्या या व्यवसायाला मात्र डिझेल दरवाढीचा फटका बसला आहे. तब्बल ८२ रुपये प्रतिलीटर डिझेल मिळत असल्याने हे व्यावसायिक अडचणीत आले आहेत. सध्या शेती हंगामात पीक कापणीची कामे सुरू आहेत. येत्या काळात खरीप पेरण्या सुरू होणार आहेत. यातून गेल्या अनेक वर्षांपासून शेतकऱ्यांसोबत संबंध असल्याने जुन्याच दरांमध्ये शेतीकामे करून देण्यात अनेकजण पसंती देत हितसंबंध जपत आहेत.
ट्रॅक्टरच्या सहाय्याने तळोदा तालुक्यासोबतच शहादा तालुक्यातही कामे करत आहे. यातून शेतकरी बांधवांसोबत हितसंबंध निर्माण झाले आहेत. डिझेलचे दर वाढल्याने दिवसभरात डिझेलचा वाढीव बोजा होतो आहे. यात शेतकरी आधीच पैसे शिल्लक ठेवून टप्प्याटप्प्याने रक्कम देतात. यात दरवाढ करावी किंवा कसे याच्या विचारात आहे.
ट्रॅक्टरद्वारे पेरणीचा एकरी खर्च वाढला
तळोदा, शहादा, नंदुरबार, अ.कुवा व नवापूर तालुक्यात वेगवेगळ्या दरांनुसार ट्रॅक्टरद्वारे मशागत करण्यात येते. नवापूर तालुक्यातील काही भागात औजार बँकेसारखा उपक्रम आहे. त्यामुळे शेतकऱ्यांना अडचणी येत नाहीत. परंतु इतर तालुक्यात मात्र अडचणी वाढल्या आहेत.
ट्रॅक्टरद्वारे एकरी पेरणीचा खर्च हा गेल्या हंगामापर्यंत पाच हजार होता. डिझेलचे दर वाढल्याने हा खर्च सहा हजारांपेक्षा अधिक होईल, अशी शक्यता आहे. याचा फटका शेतकरी बांधवांना बसतो आहे.
शेतक-यांचा पिक लागवडीचा एकरी खर्च वाढणार असल्याचा फटका हा येत्या खरीप हंगामात बसणार असल्याचे शेतकऱ्यांकडून सांगण्यात आले.
-योगेश कृष्ण मराठे,
ट्रॅक्टरमालक,रांझणी, ता. तळोदा.
इंधर दरवाढीमुळे शेतीकामांना अडचणी येत आहेत. ट्रॅक्टरचालक-मालक सवलतीचे दर देत असले तरी येत्या हंगामात वाढीव पैसे द्यावेच लागणार आहेत. सर्वच शेतकरी ट्रॅक्टरद्वारे मशागत व पेरण्या करून घेतात. यानंतरची कामेही याचप्रकारे करावी लागतात. ट्रॅक्टरचे महत्त्व वाढले आहे.
-उत्तम निंबा मराठे,शेतकरी, मोड ता. तळोदा.,
ट्रॅक्टरद्वारे मशागतीचे निश्चित असे कोणत्याही प्रकारचे दर नाहीत. दरांमध्ये वाढ होण्याचे यंदापासून सुरू झाले आहे. डिझेलचे वाढते दर हे शेतकऱ्यांना अधिक मारक आहेत. येत्या काळात याचे दुष्परिणाम दिसून येतील. ही दरवाढ मागे घेतली गेली पाहिजे.
-सुधीर बुलाखी पाटील,
शेतकरी,मोड ता. तळोदा.