नंदुरबार : जिल्ह्यात चार लाखांच्या जवळपास कोरोना प्रतिबंधात्मक लसींचे डोस नागरिकांना दिले गेले आहेत. एकीकडे लसीकरणाची गाडी वेगाने धावत असताना काहींना मात्र अडचणी येत आहेत. यात प्रामुख्याने पहिल्या डोसचे प्रमाणपत्र नसल्यावर दुसरा डोस कसा घ्यावा, अशी विचारणा करणारे अधिक आहेत. ऑनलाइन कारभार असल्याने पहिल्या डोसची नोंद मिळून दुसरा डोस मिळणे सोपे झाले आहे.
जिल्ह्यात कोरोना प्रतिबंधात्मक लसीकरणासाठी आरोग्य विभागाच्या निर्देशानुसार ऑनलाइन पद्धतीने नोंदण्या करण्यात येत होत्या. दरम्यान, प्रशासनाने ५० टक्के नोंदण्या ह्या थेट केंद्रांवर जाऊन करण्यास मुभा दिल्याने ग्रामीण भागातील नागरिकांचा प्रश्न मिटला होता. परंतु पहिला डोस घेतलेल्या ग्रामीण भागातील अनेक नागरिकांना मोबाइलवर प्रमाणपत्र डाऊनलोड न करता आल्याने अडचणी आल्या आहेत. यातून दुसरा डोस कसा घ्यावा, असा प्रश्न त्यांच्याकडून उपस्थित केला जात आहे. परंतु आरोग्य विभागाच्या सूचनेनुसार केंद्रावर जाऊन माहिती दिल्यास ऑनलाइन पडताळणी करून दुसरा डोस देणे शक्य आहे.
मोबाइल क्रमांकामुळे गोंधळ उडाला
पहिला डोस घेताना दिलेल्या मोबाइल क्रमांकावरून प्रमाणपत्र डाऊनलोड करण्यासाठी प्रयत्न केले; परंतु ते झालेच नाही. मोबाइलवर मेसेजही दिलेला आहे. ऑनलाइन अर्ज भरताना क्रमांक चुकीचा दिला गेल्यामुळे गाेंधळ झाल्याने अडचणी आल्या.
- सान्या पाडवी, अक्कलकुवा,
दुर्गम भागात मोबाइल कनेक्टिव्हिटीच्या अडचणी आहेत. यामुळे अनेक जणांना नोंदणी करूनही प्रमाणपत्र मिळू शकले नाही. आरोग्य विभागाकडून पावती दिली गेली आहे. परंतु ही पावती हरवल्याचे अनेक जण सांगत आहेत. यामुळे दुसरा डोस कसा घ्यावा, असा प्रश्न उपस्थित होत आहे.
-सरदारसिंग पाडवी, अक्कलकुवा,
नोंदण्या असल्याने अडचणी येत नाहीत.
ॲपवर नोंदण्या करण्यात आल्या आहेत. यातून एखाद्या नागरिकाचे प्रमाणपत्र न मिळाल्यास त्यांनी केंद्रात जाऊन माहिती द्यावी, त्याठिकाणी काम करणारे संगणक तज्ज्ञ माहिती घेऊन मदत करतात.
- डाॅ. एन.डी. बोडके,
जिल्हा आरोग्य अधिकारी, नंदुरबार
पहिल्या डोसचे प्रमाणपत्र न मिळाल्यास दुसरा डोसचे काय, असा प्रश्न असला तरी प्रत्येक डोसची ऑनलाइन नोंद होत आहे. यामुळे कोविन ॲपवर नागरिकाचे नाव टाकून पहिला डाेस कधी घेतला, बॅच क्रमांक काय यासह इतर बाबींची माहिती मिळते. यातून पहिल्या व दुसऱ्या डाेसमधील अंतर समजून घेत पुढील निर्णय घेतला जातो. कोविन ॲपवर सर्व माहिती असल्याने अडचणी येत नसल्याचे सांगण्यात आले.
लसीकरणावेळी ही घ्या काळजी
कोरोना होऊन बरे झालेल्या नागरिकांनी तीन महिन्यांनी लसीचा डोस घेतला पाहिजे.
लस घेण्यासाठी जाताना योग्य तो आहार घेतला पाहिजे.
कोरोनाची लक्षणे, ताप किंवा इतर काही आजारपण असल्यास सल्ला घेऊन लस घेतली पाहिजे.