‘हरिहर भेट’ यंदा केली अखेर रद्द

लोकमत न्यूज नेटवर्क
नंदुरबार : गणेशोत्सव विसर्जन मिरवणुकीचे मुख्य आकर्षण असलेल्या हरिहर भेटीला यंदा दादा व बाबा गणेश मंडळांनी अर्धविराम देण्याचे ठरविले आहे. कोरोनामुळे मिरवणुका निघणार नाहीत. त्यामुळे ही भेटही होणार नसल्याचे स्पष्ट आहे. त्याची अधिकृत घोषणा पोलीस अधीक्षकांची भेट घेऊन दोन्ही मंडळांनी केली. शिवाय पारंपारिक रथावरून मूर्ती विसर्जनासाठी नेण्यात येणार नसल्याचेही जाहीर करण्यात आले आहे. त्यामुळे यंदा गणेश विसर्जन दुपारपर्यंत आटोपले जाणार असल्याचे स्पष्ट आहे.
गणेशोत्सवात प्रत्येक भाविकाला आकर्षण असते ते दादा व बाबा गणपतीच्या हरिहर भेटीचे. दरवर्षी सायंकाळी साधारणत: आठ ते दहा वाजेच्या दरम्यान जळका बाजारात ही भेट होते. ही भेट पहाण्यासाठी भाविकांची मोठी गर्दी होते. यंदा ही भेट होणार की नाही याबाबत भाविकांमध्ये संभ्रम होता. निर्णय काय होतो याकडे लक्ष लागून होते. अखेर ही भेट रद्द करण्यात आल्याचे स्पष्ट करण्यात आले आहे.
नंदुरबारातील मानाच्या दादा गणपतीची मिरवणूक सकाळी नऊ वाजता सुरू करण्यात येते. दिवसभर मुख्य मिरवणूक मार्गावरून ही मिरवणूक सायंकाळी साडेसात ते आठ वाजता जळका बाजार परिसरात येते. त्याच्या समोरूनच बाबा गणपतीची मिरवणूक देखील येते. दोन्ही गणपतींचे रथ समोरासमोर आल्यावर आरती करण्यात येते. त्यानंतर गुलाल आणि फुलांची उधळण करून भेट साजरा केली जाते. त्यानंतर दादा, बाबा व इतर मानाच्या गणपतींच्या मागे पारंपारिक पद्धतीने तालीम संघाची मंडळे असतात. त्यामुळे या भेटील मोठे महत्व असते.
यंदा कोरोनाच्या अनुषंगाने या दोन्ही मानाच्या मंडळांसह काका गणपती मंडळ पदाधिकाऱ्यांनी विसर्जन मिरवणुका न काढण्याचे ठरविले आहे. दादा गणपतीचे पदाधिकारी निलेश सोनार, सत्यवान सोनार, सुनील सोनार, नरेंद्र सोनार, उदय सोनार आणि श्री बाबा गणपती उत्सव समितीचे मोरेश्वर सोनार, राकेश सोनार, प्रसाद सोनार, गौरव सोनार, विकास सोनार. काका गणपती मंडळाचे अश्विन सोनार, अरुण सोनार, सागर सोनार यांनी पोलीस अधीक्षक महेंद्र पंडित यांची भेट घेऊन त्याबाबतचे लेखी विनंतीपत्र दिले.
दोन्ही प्रमुख मंडळे रथावर अथवा इतर कोणत्याही प्रकारे मिरवणूक काढणार नाहीत. गणेशमूर्ती चारचाकी वाहनात ठेऊन फक्त दोन किंवा मोजक्या भक्तांकरवी सोनी विहिरीत विसर्जन केले जाणार आहे. मंडळांच्या या निर्णयाबद्दल पोलीस अधीक्षकांनी पदाधिकाऱ्यांचे अभिनंदन केले.