कोठार : तळोदा शहरात नगरपालिका निधीतून हातोडा रस्त्यावर साकारणार येणाऱ्या प्रवेशद्वाराचे भूमिपूजन आमदार राजेश पाडवी यांच्या उपस्थितीत मान्यवरांच्या हस्ते करण्यात आले. या प्रवेशद्वाराचे ‘छत्रपती शिवाजी महाराज प्रवेशद्वार’ असे नामकरण करण्यात येणार आहे.
तळोदा येथे नगरपालिकेच्या निधीतून हातोडा रस्त्यावर उभारण्यात येणाऱ्या प्रवेशद्वाराचे ‘छत्रपती शिवाजी महाराज प्रवेशद्वार’ असे नामकरण करण्यात येणार असल्याचे जाहीर करून या प्रवेशद्वाराचे भूमिपूजन आमदार राजेश पाडवी यांच्या वाढदिवसानिमित्त उपस्थित मान्यवरांच्या हस्ते कुदळ मारून करण्यात आले.
या भूमिपूजन कार्यक्रमाला नगराध्यक्ष अजय परदेशी, उपनगराध्यक्ष भाग्यश्री चौधरी, पंचायत समिती सभापती यशवंत ठाकरे, भाजपचे प्रदेश सदस्य डॉ. शशिकांत वाणी, तालुकाध्यक्ष बळीराम पाडवी, नगरसेवक संजय माळी, गौरव वाणी, सुभाष चौधरी, नंदुरबार जिल्हा युवक काँग्रेसचे जिल्हाध्यक्ष तथा नगरसेवक जितेंद्र सूर्यवंशी, माजी नगरसेवक सतिवन पाडवी, माजी जिल्हा परिषद सदस्य जितेंद्र पाडवी, माजी तालुकाध्यक्ष राजेंद्र राजपूत, भाजप जिल्हा उपाध्यक्ष आनंद सोनार, शिवसेनेचे गौतम जैन, शिरीष माळी, राणीपूर ग्रामपंचायत सदस्य प्रकाश वळवी, माजी उपनगराध्यक्ष अनुप उदासी, डॉ. स्वप्नील बैसाणे, प्रा. विलास डामरे, नगरसेवक सुरेश पाडवी, जालंधर भोई, यशवंत पाडवी, पंचायत समिती सदस्य विजयसिंह राणा, भाजप किसान मोर्चाचे सरचिटणीस प्रवीणसिंह राजपूत, शानूबाई पाडवी, जगदीश परदेशी, गोपी पावरा यांच्यासह पंचायत समिती सदस्य व विविध गावचे सरपंच व मान्यवर उपस्थित होते. यावेळी छत्रपती शिवाजी महाराजांच्या जयजयकाराच्या घोषणा कार्यकर्त्यांकडून देण्यात आल्या.
या प्रवेशद्वारामुळे नंदुरबारकडून तळोदा शहरात प्रवेश करताना लागणारा हातोडा रस्त्याचा चेहरामोहरा बदलणार असून, शिवाजी महाराजांचे नाव प्रवेशद्वाराला दिल्यामुळे शहराचा सांस्कृतिक वसा जपण्यास मदत होणार आहे. या प्रवेशद्वाराला शिवाजी महाराजांच्या नाव देण्याला सर्वांनी सहमती दर्शविली असून, महाराष्ट्राच्या आराध्य दैवताचे नामकरण हातोडा रस्त्यावरील प्रवेशद्वाराला देण्यात आल्याने समाधान व्यक्त होत असल्याचे भाजपचे प्रदेश सदस्य डॉ. शशिकांत वाणी यांनी सांगितले.