तळोदा तालुक्यातील ग्रामीण भागात कोविड लसीकरणाबाबत नागरिकांत निर्माण झालेल्या गैरसमजुतीमुळे भीतीचे वातावरण असून, अफवा पसरल्याने बहुतेक नागरिक स्वत:हून लसीकरण करून घेण्यास तयार होत नसल्याची परिस्थिती आहे.
गेल्या वर्षी कोरोनाच्या पहिल्या लाटेत ग्रामीण भाग म्हणावा तेवढा प्रभावित झाला नव्हता. त्यामुळे बहुतेक ग्रामीण आदिवासी समाजात वेगळीच समजूत उदयास आली. मात्र यंदा आलेल्या कोरोनाच्या दुसऱ्या लाटेत शहरी भागापेक्षा ग्रामीण भागात जास्त प्रमाणात शिरकाव झाल्याची परिस्थिती आहे. त्यामुळे मागील वर्षीच्या तुलनेत यंदा ग्रामीण भागात कोविडची लागण झालेल्यांचे प्रमाण वाढले आहे. त्यामुळे योग्य उपचार व मार्गदर्शनाअभावी मृत्यूचे प्रमाणदेखील वाढल्याच्या पार्श्वभूमीवर आरोग्य यंत्रणा खडबडून जागी झाली आहे. नागरिकांचे जीव वाचविण्यासाठी वेळीच योग्य उपचार व्हावा यासाठी आरोग्य विभागातील डाॅक्टर, कर्मचारी खेडोपाडी भेटी देत लसीकरणासाठी जनजागृती करीत आहेत. मात्र बहुतेक नागरिकांच्या विरोधाचा सामना करून डाॅक्टर व कर्मचारी आपली सेवा बजावताना दिसत आहेत.
सोमावल प्राथमिक आरोग्य केंद्र येथे काही दिवसांपासून लसीकरण मोहीम राबविण्यात येत आहे. यानिमित्ताने बुधवारी माजी मंत्री पद्माकर वळवी यांनी सपत्निक लसीकरण करून घेतले. या वेळी त्यांनी आदिवासी बोलीभाषेत लसीकरणासाठी आवाहन केले.
या वेळी तालुका आरोग्य अधिकारी डॉ. महेंद्र चव्हाण, सोमावल वैद्यकीय अधिकारी डॉ. सुधीर ठाकरे, समुदाय आरोग्य अधिकारी डॉ. हर्षदा चौधरी, आरोग्य सुपरवायझर एस.ए. ठाकरे, आर.डी. आगळे, लॅब सुप्रिटेंड असिस्टंट के.एस. कुवर, आरोग्य साहाय्यिका ए.व्ही. कुवर, आरोग्य सेवक व्ही.जे. सुसर, आरोग्य सेविका ए.एस. करमकर, पी.ए. वळवी, जयश्री वसावे, परिचर दत्तू बोरसे, मनीषा साळवेसह गौरव वाणी आदी उपस्थित होते.