जप्त केलेल्या वाळू वाहतूक करणाऱ्या वाहनांचा लिलाव करण्याचा इशारा

तालुक्यातील गोमाई व इतर नदीपात्रातून मोठ्या प्रमाणात बेकायदेशीररित्या वाळूची वाहतूक व विक्री केली जाते. महसूल विभागामार्फत अशा वाहनांवर कारवाई केली जाते व त्यांना आर्थिक दंड भरण्याबाबत नोटिसा बजावल्या जातात. गेल्या काही महिन्यांत महसूल विभागाने वाळूची चोरटी वाहतूक करणाऱ्या वाहनांवर मोठ्या प्रमाणात कारवाई केली आहे व ही वाहने तहसील कार्यालय परिसरात जप्त करून ठेवली आहेत. मात्र, दंडाची रक्कम भरण्याबाबत नोटिसा बजावल्यानंतरही अद्यापर्यंत आठ वाहनचालक व मालकांनी सुमारे नऊ लाख ४९ हजार ५०० रुपये दंडाची रक्कम भरलेली नाही. अशा दंड न भरणाऱ्या वाहनचालक मालकांनी ३१ मार्चपर्यंत दंडाची रक्कम भरून वाहने सोडवावेत, अन्यथा या वाहनांचा जाहीर लिलाव केला जाईल. लिलावात मिळालेल्या रकमेतून दंड वसूल केला जाईल, असा इशारा तहसीलदार डॉ.कुलकर्णी यांनी दिला आहे.