उमरेड : ‘माझे उमरेड मला परत द्या’ अशी आर्त हाक उमरेडच्या राजकीय आखाड्यात दोन वर्षांपूर्वी देण्यात आली होती. शांत-संयमी आणि विविध संस्कृतीने नटलेल्या उमरेड मतदारसंघात खून, गांजा, चोरी-चकाटी, सोशल मीडियावर अश्लीलता, जीवे मारण्याच्या धमकीचे प्रकार प्रचंड प्रमाणात वाढले आहेत. त्यामुळे या वाढत्या गुन्हेगारीला रोखणार कोण, असा सवाल केला जात आहे.
रेतीच्या अवैध वाहतुकीच्या गोरखधंद्याकडे कुणाचेही लक्ष दिसून येत नाही. दररोज पहाटेपासून ते रात्रभर गोसेच्या पात्रातील आणि अवतीभवती असलेली रेती ओरबडून काढली जात आहे. एकापाठोपाठ एक सुसाट वेगाने पवनी, भिवापूर, उमरेड शहर पार करीत ट्रक, टिप्परच्या माध्यमातून राज्याच्या उपराजधानीत हा बेहिशेबी ‘माल’ रवाना होत आहे. मात्र, यावर अधिकारी, नेते, लोकप्रतिनिधी सारेच मूग गिळून गप्प का, असा सवाल केला जात आहे. या गोरखधंद्यावर कुणाचाही अंकुश नसल्याचा आरोप आता खुलेआम होत आहे.
अनेक ठिकाणांहून विनापरवानगीने मुरुमाचे उत्खनन सुरू असल्याच्याही तक्रारी कमी नाहीत. याकडेसुद्धा मुद्दाम डोळेझाक करीत प्रकरणावर पांघरूण टाकण्याचेच काम होत असल्याचा नागरिकांचा आरोप आहे.
कुही येथील मौजा मांगली येथे एका शेतमजुराचा खून करण्यात आला. नरेश दशरथ कुरूटकर (३७) या शेतमजुराचा कोणताही गुन्हा नसताना केवळ पैशांच्या मोहापायी त्याचा झोपेतच दोन नराधमांनी खात्मा केला. त्याच दिवशीची दुसरी घटना उमरेडच्या गांगापूर चौकात घडली. अगदी क्षुल्लक कारणावरून शुभम मोतीराम ठवकर या तरुणाच्या डोक्यावर फरशीने प्रहार करीत त्याला संपविले गेले. एकीकडे हा तरुण रक्तबंबाळ होत असताना दुसरीकडे अनेकजण केवळ बघ्याची भूमिका घेत होते. उमरेड परिसरात मागील काही वर्षांपासून असामाजिक तत्त्वांचा बोलबाला दिसून येतो. एकमेकांविरुद्ध कट-कारस्थान, डावपेच रचण्याच्या असंख्य घटना घडत आहेत. पोलीस-प्रशासनाचा धाक संपला की काय, अशी परिस्थिती तरी सध्या उमरेड नगरीत दिसून येते.
सोशल मीडियावर अभद्र भाषा
उमरेड परिसरातील काही सोशल मीडिया ग्रुपवर अभद्र, अश्लील भाषेचा प्रयोग करणारे असंख्य मेसेज तथा व्हिडीओ क्लिप व्हायरल होत आहेत. दिवसभर चॅटिंगमध्ये गुंतलेले ‘भामटे’ अभद्र भाषेत शेरे मारतात. व्हॉट्सअॅप ग्रुपवर वातावरण खराब करण्याचे काम करतात. यातूनच विविध भांडणे, हाणामारीचे प्रकार चव्हाट्यावर येत आहेत. यावरही अंकुश असावा आणि कारवाई व्हावी, अशीही मागणी जोर धरत आहे.
गांजा तस्करीत महिला
उमरेड पोलिसांनी गांजा तस्करीत कुही परिसरातील दोघांना अटक केली. यात शिवराम खडसे, रा. मुसळगाव याच्यासह एका महिला आरोपीचा समावेश आहे. काही वर्षांपासून परिसरात हा धंदासुद्धा मोठ्या प्रमाणावर आपली पाळेमुळे घट्ट करीत होता. गांजा तस्करीत महिलेचा समावेश आढळून आल्याने अनेकांचे डोळे वटारले आहेत. गांजा तस्करीचा प्रत्येक कोपरा पोलिसांनी तपासावा, अशी मागणी जोर धरत आहे.