'वंचित' मोर्चा काढण्यावर ठाम, पोलिसांनी परवानगी नाकारली

Nagpur : वंचित बहुजन आघाडी आणि काँग्रेस यांच्या संयुक्त विद्यमाने सोमवारी संघ मुख्यालयावर काढण्यात येणाऱ्या मोर्चाला पोलिसांनी परवानगी नाकारली आहे.

लोकमत न्यूज नेटवर्क
नागपूर : वंचित बहुजन आघाडी आणि काँग्रेस यांच्या संयुक्त विद्यमाने सोमवारी संघ मुख्यालयावर काढण्यात येणाऱ्या मोर्चाला पोलिसांनी परवानगी नाकारली आहे. संविधान चौकात सभा घेऊन जिल्हाधिकारी किंवा विभागीय आयुक्तांना निवेदन सादर करावे, असे पोलिसांनी म्हटले आहे. वंचित बहुजन आघाडी व काँग्रेस मात्र संघ कार्यालयावर मोर्चा काढण्यावर ठाम असल्याचे सांगितले जाते. त्यामुळे पोलिस दक्ष असून, आंदोलनकर्तेही तयारीत असल्याचे सांगतात.

राष्ट्रीय स्वयंसेवक संघ (आरएसएस) ही भाजपची मातृसंघटना आहे. आरएसएसच्या निर्देशानुसारच भाजप कार्य करीत असल्याची टीका अनेकदा झाली आहे. यापूर्वी बामसेफ आणि भारत मुक्ती मोर्चाच्या वतीने आरएसएस मुख्यालयावर मोर्चा काढण्यात आला. आता एपस्टीन फाईल्सवर संघाने स्पष्ट उत्तर द्यावे, या मागणीसाठी काँग्रेस आणि वंचित बहुजन आघाडीच्यावतीने सोमवारी (दि.२३ मार्च) संघ मुख्यालयावर मोर्चा आयोजित केला आहे. वंचितचे नेते अॅड. प्रकाश आंबेडकर व काँग्रेसचे प्रदेशाध्यक्ष हर्षवर्धन सपकाळ यांच्या नेतृत्वात सकाळी अकरा वाजता संविधान चौकापासून हा मोर्चा काढण्यात येणार आहे. परंतु, पोलिसांनी मात्र या मोर्चाला आरएसएसच्या मुख्यालयापर्यंत काढण्यास परवानगी नाकारली आहे.

संविधानिक मार्गाने संविधान चौकातच सभा घेण्याबाबत अर्ज केल्यास सकारात्मक विचार केला जाईल, असे पोलिसांनी स्पष्ट केले आहे. मुंबई आणि छत्रपती संभाजीनगर येथे सुद्धा वंचितच्या मोर्चाला परवानगी नाकारण्यात आली होती. तरीदेखील मोर्चा निघाला होता. त्यामुळे पोलिसांनी परवानगी नाकारली तरी हा मोर्चा निघेलच, असा कार्यकर्त्यांचा दावा असून, पोलिसांनीही तगड़ा बंदोबस्त ठेवला आहे. दरम्यान, वंचित बहुजन आघाडीने या मोर्चाची संपूर्ण तयारी केली आहे. रविवारी मोर्चाच्या नियोजनासाठी वंचित बहुजन आघाडीच्या नागपूर शहर व जिल्ह्यातील कार्यकर्त्यांची महत्त्वपूर्ण बैठक रविभवन येथे पार पडली. या बैठकीमध्ये वंचितचे राज्य उपाध्यक्ष धैर्यवर्धन फुंडकर, राज्य महासचिव राजेंद्र पातोडे, राज्य कार्यकारिणी सदस्य जितरत्न पटाईत, अॅड. सुजाता वालदेकर आणि पूर्व विदर्भ संयोजक अरविंद सांदेकर उपस्थित होते. दरम्यान, वंचितचे इतरही ज्येष्ठ नेते नागपुरात दाखल झाले आहेत.

भाजप कार्यकर्ते व हिंदू संघटनांचा विरोध

पोलिसांचे म्हणणे आहे की, आरएसएस मुख्यालय हे अतिसंवेदनशील स्थळाच्या यादीत आहे. त्यांना दहशतवादी संघटनांकडून धोका आहे. या ठिकाणी मोठ्या प्रमाणावर गर्दी होणे धोक्याचे ठरेल. मोर्चामुळे शहरात कायदा व सुव्यवस्थेचा प्रश्न निर्माण होईल. या मोर्चाला राजकीय व धार्मिक संघटना, भाजप कार्यकर्ते व हिंदू संघटनांचा विरोध आहे. यापूर्वी शहरात धार्मिक दंगल झाली आहे, त्यामुळे पुन्हा दोन समाजात तेढ निर्माण होऊ शकते, असे कारण देत पोलिसांनी ही परवानगी नाकारली आहे.

"आमच्या मोर्चाला हिंदू संघटनांचा विरोध आहे म्हणून पोलिसांनी परवानगी नाकारली असेल तर पोलिसांच्या विरोधात कोर्टात जाऊ."
- अॅड. प्रकाश आंबेडकर, वंचित बहुजन आघाडीचे नेते

"वंचित बहुजन आघाडी व काँग्रेसचा संयुक्त मोर्चा हा आरएसएसच्या विरोधात नाही तर त्यांच्या कार्यालयावर आहे. इतिहासात पहिल्यांदाच आरएसएससोबत संवाद साधण्यासाठी हा मोर्चा होत आहे. देशाचे पंतप्रधान नरेंद्र मोदी यांचे नाव एपस्टीन फाइलमध्ये आले आहे. या फाइलमध्ये नाव आल्यामुळे ते अमेरिकेला कॉम्प्रमाईज झाल्याचे दिसून येते. आरएसएस ही संस्था नैतिकता व देशभक्तीवर बोलत असते. नरेंद्र मोदी यांना आरएसएसने पंतप्रधानपदावर बसवले आहे. एपस्टीन फाइलमध्ये पंतप्रधान मोर्दीचे नाव आले हे आरएसएसला पटतंय का? आरएसएसच्या नैतिकतेला पटतंय का?"
- सुजात आंबेडकर, वंचितचे नेते