ट्रकच्या धडकेत दोघांचा मृत्यू; मनिष नगर, मानकापूरमध्ये अपघात

आरोपी ट्रकचालकाची चौकशी सुरू

 नागपूर : ट्रकचालकाच्या निष्काळजीपणामुळे एका तरुण फळविक्रेत्यासह दोघांचा करुण अंत झाला. बेलतरोडी आणि मानकापूर पोलिस ठाण्याच्या हद्दीत हे दोन वेगवेगळे अपघात घडले. मनीष नगरातील राम बाबूलाल कटरे ( वय १८) हा फळविक्रेता सोमवारी दुपारी १२.३० च्या सुमारास त्याच्या दुचाकीने बेलतरोडीकडे घरी जेवण करायला जात होता. मनिष नगर मार्गावरील बारजवळच्या वळणाजवळ मागून वेगात आलेल्या ट्रकने कटरेच्या दुचाकीला धडक दिली. त्यामुळे तो खाली पडून गंभीर जखमी झाला. त्याला उपचाराकरीता मेडिकलमध्ये नेले असता डॉक्टरांनी तपासून मृत घोषित केले. या अपघातामुळे परिसरात संतापाचे वातावरण निर्माण झाले होते. माहिती कळताच बेलतरोडी पोलीस तेथे पोहोचले. त्यांनी आरोपी ट्रकचालक ओमप्रकाश वीरसिंग वर्मा याला अटक केली. दुसरा एक अपघात मानकापुरातील गंगानगर लहान पुलाजवळ घडला. राजू नारायण मांगे (वय ५०, धम्मदीप बुद्ध विहार जवळ झिंगाबाई टाकळी) हे रविवारी सकाळी १०.१५ च्या सुमारास सायकलने कामावर जात होते. आरोपी ट्रक चालकाने मागून मांगे यांच्या सायकलला जोरदार धडक मारली. त्यामुळे त्यांचा मृत्यू झाला. वंदना राजू मांगे यांच्या तक्रारीवरून मानकापूर पोलिसांनी अपघाताची नोंद केली. आरोपी ट्रकचालकाची चौकशी सुरू आहे.