लग्नाचे आमिष दाखवून अत्याचार

लग्नाचे आमिष दाखवून तब्बल ५ वर्षांपासून शारीरिक संबंध प्रस्थापित केल्यानंतर लग्नास नकार मिळाल्याने पीडित तरुणीने विष प्राशन करून आत्महत्येचा प्रयत्न केला.

नागपूर : लग्नाचे आमिष दाखवून तब्बल ५ वर्षांपासून शारीरिक संबंध प्रस्थापित केल्यानंतर लग्नास नकार मिळाल्याने पीडित तरुणीने विष प्राशन करून आत्महत्येचा प्रयत्न केला. या प्रकरणी आरोपीविरुद्ध गुन्हा दाखल करण्यात आला आहे. धीरज पांडुरंग चिंचघरे (२६) रा. जैसाववाडी जुनी मंगळवारी, असे आरोपीचे नाव आहे. आरोपी धीरज ट्रॅव्हल्स एजन्सीमध्ये काम करतो. सूत्रांनुसार धीरज आणि २२ वर्षीय पीडित तरुणी एकाच शाळेत शिकत होते. शाळेतील मैत्रीचे प्रेमात रूपांतर झाले. एकाच समाजातील असल्याने धीरजने तिला लग्नाचे आश्वासन दिले. दोघेही बाहेर फिरायला जाऊ लागले. यादरम्यान त्याने बाहेर आणि आपल्या घरी तिच्याशी शारीरिक संबंध प्रस्थापित केले. पीडित मुलगी तेव्हा अल्पवयीन होती. त्यामुळे वयात आल्यावर लग्न करू, असे आश्वासन तो देत होता. गेल्या ५ वर्षांपासून हा प्रकार सुरू होता. गेल्या काही दिवसांपासून पीडित तरुणी धीरजला लग्नासाठी विचारू लागली. परंतु तो तिला टाळत होता. पीडितेने समाजातील काही प्रतिष्ठित लोकांना यासंदर्भात सांगितले. त्यांनी धीरजला समजावण्याचा प्रयत्न करीत पोलिसात तक्रार करण्याचा इशारासुद्धा दिला. परंतु त्याने लग्नास नकार दिला. तसेच न्यायालयातील अंतरिम जामीनसुद्धा घेऊन ठेवला. धीरजच्या या वागण्यामुळे दु:खी झालेल्या पीडित तरुणीने विष प्राशन करून आत्महत्येचा प्रयत्न केला. तिला तातडीने मेयो रुग्णालयात दाखल करण्यात आल्याने तिचा जीव वाचला. पोलिसांनी याप्रकरणी बलात्काराचा गुन्हा दाखल केला आहे. पीडिता गरीब कुटुंबातील आहे. तिचे वडील अंध आहेत. कुटुंबात आईवडीलांसह एक लहान बहीण आहेत. धीरजचे वडील सेवानिवृत्त मनपा कर्मचारी आहे. या घटनेमुळे नागरिकांमध्ये प्रचंड रोष आहे. (प्रतिनिधी)