लोकमत न्यूज नेटवर्क
नागपूर : तलवारीच्या धाकावर धूमधाम करीत असलेल्या एका अट्टल गुन्हेगाराच्या यशोधरानगर पोलिसांनी मुसक्या आवळल्या. शुभम सुरेश चिरुडकर (वय २४) असे या गुंडाचे नाव असून, शहरातील विविध भागात चिरुडकरविरुद्ध हत्या, हत्येचा प्रयत्न, चोऱ्या, लुटमारीसह तब्बल ११ गुन्हे दाखल आहेत.
यशोधरानगर ठाण्याचे पोलीस पथक रविवारी रात्री धम्मदीपनगरात गस्त करीत असताना एनआयटी ग्राऊंडजवळ त्यांना एक गुंड तलवारीच्या धाकावर लोकांना लुटण्याचा प्रयत्न करीत असल्याची माहिती मिळाली. त्यामुळे पोलीस पथकाने तिकडे धाव घेतली. गराडा घालून पोलिसांनी चिरुडकरला जेरबंद केले. त्याच्याजवळून तलवार जप्त करण्यात आली. पोलीस ठाण्यात त्याचा रेकॉर्ड तपासला असता, तो अट्टल गुन्हेगार असल्याचे स्पष्ट झाले. त्याला बेड्या ठोकून त्याची रवानगी कोठडीत करण्यात आली. पोलीस उपायुक्त नीलोत्पल, सहायक आयुक्त रोशन पंडित आणि ठाणेदार अशोक मेश्राम यांच्या मार्गदर्शनाखाली उपनिरीक्षक श्रीनिवास दराडे, जितेंद्र भार्गव, हवालदार मनीष भोसले, नायक शोएब शेख, नीतेश धाबर्डे, राजकुमार पाल आणि प्रसन्नजित जांभूळकर यांनी ही कामगिरी बजावली.
---