नागपूर : बेकरी प्रोडक्ट्स विक्रीचा परवाना असताना एका व्यक्तीने चक्क दुकानाला पानठेला बनवत बंदी असलेल्या ई-सिगारेट्सची विक्री सुरू केली होती. नागपूर पोलिसांच्या गुन्हे शाखेच्या पथकाने टाकलेल्या धाडीदरम्यान ही बाब समोर आली आहे. गुन्हे शाखेने शहरात बजाजनगर व माटे चौकात पानठेल्यांवर धाड टाकत ई-सिगारेट्स विक्रीच्या रॅकेटचा भंडाफोड केला.
केंद्र शासनाने ‘ई-सिगारेट्स’च्या विक्रीला बंदी घातली असूनदेखील याची लपून विक्री सुरू असते. नागपुरात ई-सिगारेट्सची विक्री होत असल्याची टीप गुन्हे शाखेच्या पथकाला मिळाली होती. बजाजनगरातील विजय पान पॅलेस येथे ई-सिगारेट्स मिळत असल्याच्या माहितीला खबऱ्यांनी दुजोरा दिला. त्यानंतर पोलिसांनी तेथे धाड टाकली. सिमेंटचे बांधकाम असलेल्या पक्क्या दुकानाला पानठेल्याचे स्वरूप देण्यात आले होते. तेथे पोलिसांना ई-सिगारेट्ससह विविध फ्लेवर्सचे तंबाखूजन्य हुक्का फ्लेवर्ड पॅकेट्सदेखील आढळले. पोलिसांनी जवळपास २५ हजारांचा माल जप्त केला. संबंधित दुकानाला बेकरी प्रोडक्ट्स विक्रीचा परवाना असताना ई-सिगारेट्सची विक्री सुरू असल्याचे चौकशीदरम्यान स्पष्ट झाले. पोलिसांनी अशोक विजयसिंह राठोड (डोबीनगर हाऊसिंग सोसायटी) याच्याविरोधात गुन्हा दाखल केला आहे.
दुसरी धाड माटे चौकाजवळील गॅलेक्सी अपार्टंमेंटमधील टेक्सास स्मोक शॉप, एम. के. एंटरप्रायझेस येथे टाकण्यात आली. तेथेदेखील पोलिसांना २० हजार रुपयांच्या प्रतिबंधित ई-सिगारेट्स आढळून आल्या. संबंधित ठिकाणी रात्री उशिरापर्यंत तरुणांना या ई-सिगारेट्स पुरविण्यात येत होत्या. तसेच या दुकानामुळे परिसरातील नागरिकांचा त्रासदेखील वाढलेला आहे.
तरुण ‘टार्गेट’, ‘इम्पोर्ट’वर भर
पाश्चात्त्य देशांप्रमाणेच आपल्याकडेदेखील तरुणांना ई-सिगारेटचा विळखा पडतो आहे. बंदी असल्याने उपराजधानीतही सिगारेट सहजासहजी उपलब्ध होत नसल्याने अगदी बाहेरून याला ‘इम्पोर्ट’ करण्यात येत आहे. याकरिता काही विशिष्ट ‘एजंट’देखील शहरात सक्रिय आहेत. यात वापरण्यात येत असलेले रसायन धोकादायक ठरू शकतात. त्यामुळे या सिगारेटपासूनदेखील दूरच राहिले पाहिजे, असा सल्ला वैद्यकीय तज्ज्ञांकडून देण्यात येत आहे.