रात्री पोहोचली एफडीएची टीम
नागपूर : लकडगंज पोलिसांनी राज्यात प्रतिबंधित असलेला ४९ लाखाचा सुगंधित तंबाखू पकडला आहे. ही कारवाई बुधवारी सकाळी ९.३० वाजता वर्धमाननगरात करण्यात आली. पोलिसांना सकाळी ९ वाजता ट्रक क्रमांक सीजी, ०४-जेसी १०११ मध्ये लाखो रुपयांचा सुगंधित तंबाखू शहरात आणल्याची माहिती मिळाली. त्यानंतर वर्धमाननगरात ट्रकचा शोध घेण्यात आला. यावेळी त्यात माझा, ईगल, गोल्ड आणि रिमझिम ब्रँडचा तंबाखू आढळला. हा माल ३ हजार ३५७ किलोचा असून त्याची किंमत ४९ लाख १५ हजार ३७० रुपयांचा आहे. याची सुचना अन्न व औषध प्रशासन विभागाच्या (एफडीए) अधिकाऱ्यांना देण्यात आली. परंतु एफडीएची टीम रात्री ८ वाजता लकडगंज ठाण्यात पोहोचली. हा माल राजा नावाच्या व्यावसायिकाचा असल्याची चर्चा आहे. परंतु वाडीच्या नितीन कांबळे या व्यक्तीने हा माल त्याचा असल्याचा दावा केला आहे. त्यानंतर पोलिसांनी एफडीएचे निरीक्षक विनोद धवड यांच्या तक्रारीवरून विविध कलमांतर्गत अन्न सुरक्षा कायदा २००६ नुसार गुन्हा दाखल केला. ही कारवाई लकडगंजचे निरीक्षक पराग पोटे यांच्या मार्गदर्शनाखाली सहायक निरीक्षक विलास पाटील, संजय बांगडकर, राम कैलाश यादव, वासुदेव जयपूरकर, फिरोज खान यांनी केली.
............
सँपल घेऊन ट्रक केला सील
एफडीएच्या अधिकाऱ्यांनी लकडगंज ठाण्यात गुन्हा दाखल केल्यानंतर ट्रकमधून जप्त केलेल्या मालाचे चार सँपल घेतले. त्यासोबतच सुगंधित ट्रकच्या तस्करीत पकडलेल्या ट्रकला सील केले आहे.
............