नागपूर :नागपूर शहरातील वर्धा रोडवर पुन्हा एकदा एक भीषण अपघात घडला आहे. शनिवारी ८ जूनच्या रात्री एका २५ वर्षीय तरुणाचा बीएमडब्लू चालकाच्या कचाट्यात येऊन अपघाती मृत्यू झाला. माहितीनुसार, आरोपीने बीएमडब्ल्यू कार वेगाने चालवत असताना या अपघाताची घटना घडली. अपघातानंतर आरोपीने घटनास्थळावरून पळ काढला, ज्यामुळे या प्रकरणात गंभीर वाद निर्माण झाला आहे.
मृत तरुणाचे नाव योगेश बोपचे (२५) आहे. तो एम्समध्ये भरती असलेल्या त्याच्या नातेवाईकाला टिफिन देऊन येत असतांना हा अपघात घडला. रात्री ३.१५ वाजताच्या सुमारास चिंचभवन परिसराच्या जवळ बीएमडब्लू (HP ८९/A १५९२) भरधाव वेगाने येऊन योगेश आणि त्याच्या नातेवाईकाच्या दुचाकीला धडकली. अपघात इतका भीषण होता की ते दोघेही हवेत उडत रस्त्यावर पडले.
उपस्थित लोकांच्या सांगण्यानुसार अपघातानंतर बीएमडब्लू चालक पळाला. अपघातानंतर दोघांना एम्स हॉस्पिटलमध्ये नेण्यात आले, डॉक्टरांनी योगेशचा रस्त्यानेच मृत्यू झाल्याचे घोषित केले तर त्याच्यासोबत असलेले नातेवाईक मृत्युसोबत झुंज देत आहेत. बेलतरोडी पोलिसांनी अज्ञाताविरुद्ध गुन्हा दाखल केला असून पुढील तपास सुरु केला आहे. सीसीटीव्ही फुटेजच्या मदतीने आरोपीचा शोध लागण्याची आशा आहे.
या घटनेमुळे नागपूर शहरात उच्चभ्रू व्यक्तींच्या मद्यपान करून वाहन चालवण्याच्या प्रकरणांबद्दल चिंता व्यक्त केली जात आहे. या प्रकरणाची सखोल चौकशी सुरू असून, आरोपीला लवकरात लवकर अटक करून न्यायालयात हजर करण्यात येईल, अशी माहिती पोलिसांनी दिली आहे.