हिंगणा : लग्नसमारंभात क्षमतेपेक्षा जास्त गर्दीस परवानगी देणाऱ्या हिंगणा तालुक्यातील दोन मंगल कार्यालयावर तहसील प्रशासनाच्या भरारी पथकाने मंगळवारी धाड टाकत दंडात्मक कारवाई केली. यात वानाडोंगरी येथील बाबडे सभागृह आणि हिंगणा येथील रेणुका सभागृहाचा समावेश आहे. या दोन्ही मंगल कार्यालयात कोविड नियमाचे सर्रास उल्लंघन होत असल्याच्या तक्रारी प्रशासनाला मिळताच ही कारवाई करण्यात आली.
जिल्ह्यात कोरोनाचे सर्वाधिक जास्त संक्रमण हिंगणा तालुक्यात झाले आहे. असे असतानाही तालुक्यातील काही मंगल कार्यालयात आयोजित करण्यात येणाऱ्या लग्नसमारंभात मोठ्या प्रमाणात गर्दी होत असल्याचे दिसून येत आहे.
तहसील प्रशासनाच्या भरारी पथकाने मंगळवारी या मंगल कार्यालयाची तपासणी केली असता, येथे प्रवेशद्वारावर थर्मल स्कॅनिंगची सुविधा दिसून आली नाही. यासोबतच कार्यालयाच्या क्षमतेपेक्षा ५० टक्क्याहून अधिक नागरिकांची येथे गर्दी दिसून आली. येथे अनेक नागरिकांचा विना मास्क वावरही दिसून आला. यासोबतच मंगल कार्यालयात उपस्थित नागरिकांकडून फिजिकल डिस्टन्सिंगचे मोठ्या प्रमाणात उल्लंघन होत असल्याचे दिसून आले. त्यामुळे या दोन्ही मंगल कार्यालयाचे व्यवस्थापक आणि आयोजकावर आर्थिक दंडात्मक कारवाई करण्यात आली. येथे दोन्ही ठिकाणाहून ३० हजाराचा दंड वसूल करण्यात आला. यासोबतच कोविड-१९ नियमाचे उल्लंघन केल्याप्रकरणी बाबडे सभागृहावर एक लाख रुपये तर रेणुका सभागृह प्रशासनाला ५० हजार रुपये दंड तसेच साथरोग प्रतिबंधक कायदा १८९७, आपत्ती व्यवस्थापन कायदा २००५ चे कलम ५१ ते ६० तसेच भादंविच्या कलम १८८ अन्वये गुन्हा दाखल का करण्यात येऊ नये, अशी नोटीस बजाविण्यात आली. उपरोक्त कारवाई हिंगण्याचे तहसीलदार संतोष खांडरे यांच्या मार्गदर्शनात नायब तहसीलदार महादेव दराडे, वानाडोंगरीचे मंडळ अधिकारी राजेश चुटे, तलाठी सतीश तिवारी आणि एमआयडीसी पोलीस ठाण्याच्या पथकाने केली.
बाबडे आणि रेणुका सभागृहात कोविड नियमाचे उल्लंघन होत असल्याच्या तक्रारी तहसील प्रशासनाला मिळाल्या होत्या. प्रशासनाच्या भरारी पथकाने केलेल्या तपासणीत हे दिसून आले. त्यामुळे दोन्ही मंगल कार्यालयावर दंडात्मक कारवाई केली आहे. कोरोनाचा वाढता प्रादुर्भाव लक्षात घेता नागरिकांनाही नियमाचे पालन करणे गरजेचे आहे. यापुढे तालुक्यात मंगल कार्यालय आणि लॉनवर क्षमतेपेक्षा जास्त गर्दी आढळल्यास ते सील केले जातील.
- संतोष खांडरे, तहसीलदार, हिंगणा