लोकमत न्यूज नेटवर्क
नागपूर : एकमेकांची गंमत सुरू असताना वाद वाढल्यानंतर एका आरोपीने मित्राचा जीव घेतला. त्यानंतर पोलीस ठाणे गाठून स्वत:ला अटक करवून घेतली. शुक्रवारी रात्री ११ च्या सुमारास यशोधरानगर पोलीस ठाण्याच्या हद्दीत ही घटना घडली. आकाश सुनील पुरी (वय २५) असे आरोपीचे नाव आहे.
आरोपी पुरी आणि अजय गणपत भारती (वय २५) हे दोघे मेहंदीबाग कॉर्नर, गोसावी आखाडा भागात राहायचे. ते सोबतच मजुरीही करायचे. त्यांच्यात चांगली मैत्री होती. त्यामुळे गंमतजंमतही चालायची. शुक्रवारी रात्री नेहमीप्रमाणे ते दोघे घराजवळ बसून एकमेकांची गंमत करत होते. शब्द जिव्हारी लागल्याने त्यांच्यात वाद वाढला. तेव्हा कसेबसे निपटल्यानंतर हे दोघे पाचपावलीत गेले. तेथे एका दारूभट्टीवर दारू पिल्यानंतर त्यांच्यात पुन्हा वादाला सुरुवात झाली. यावेळी आरोपी पुरीने चाकू काढून अजयवर हल्ला चढवला. छाती, पोट आणि कंबरेवर घाव घातल्याने चाकू अजयच्या शरीररात फसला. दरम्यान, आरडाओरड ऐकून बाजूची मंडळी धावली. त्यांनी गंभीर अवस्थेतील अजयला इस्पितळात नेले. तेथे डॉक्टरांनी त्याला मेयोत नेण्याचा सल्ला दिला. मेयोत नेले असता डॉक्टरांनी मृत घोषित केले.
--
परिसरात तणाव
या घटनेमुळे परिसरात प्रचंड तणावाचे वातावरण निर्माण झाले. मोठ्या संख्येत नातेवाईक आणि बाजूची मंडळी गोळा झाल्याने आरोपी आकाश पुरीला स्वत:च्या जीवाची चिंता वाटू लागली. त्याने आपल्या जवळच्यांना ती बाब सांगितली आणि नंतर स्वत:च यशोधरानगर पोलीस ठाणे गाठून अटक करवून घेतली. पोलिसांनी त्याला न्यायालयात हजर करून त्याचा पीसीआर मिळवला.
----