पंतप्रधान ग्राम सडक योजनेच्या कार्यकारी अभियंत्यास अटक

येथील लाचलुचपत प्रतिबंधक विभागाने वर्ध्यात कारवाईचा धडाकाच सुरू केला आहे. वाहनाच्या नवा करनाम्याकरिता १२ हजार रुपयांची लाच घेताना पंतप्रधान ग्रामसडक योजनेचा कार्यकारी

वर्धा : येथील लाचलुचपत प्रतिबंधक विभागाने वर्ध्यात कारवाईचा धडाकाच सुरू केला आहे. वाहनाच्या नवा करनाम्याकरिता १२ हजार रुपयांची लाच घेताना पंतप्रधान ग्रामसडक योजनेचा कार्यकारी अभियंता सुधीर बापूराव झोडपे याला गुरुवारी कार्यालयातच रंगेहात अटक करण्यात आली. पोलीस सूत्रानुसार, नीरज दयाराम रक्षिले (३२) रा. धन्वंतरीनगर सेवाग्राम रोड वरुड हा कार्यालयात खासगी वाहनांचा निविदानुसार पुरवठा करतो. याने पंतप्रधान ग्राम सडक योजनेच्या कार्यकारी अभियंत्याकडून निघालेल्या निविदा भरल्या होत्या. या निविदा मंजूर झाल्या. यानुसार १६ आॅगस्ट २०१३ पासून एमएच ३२ बी ८७५ क्रमांकाची गाडी सुरू झाली. त्याला इंधन खर्चापोटी ३० हजार मिळत होते. नंतर इंधन खर्चात वाढ झाल्याने त्याला ३५ हजार रुपये मिळायचे. हा करारनामा पूर्वी कार्यरत असलेल्या कार्यकारी अभियंत्यांच्या काळातला होता. नंतर हा प्रभार सुधीर झोडपेकडे आला. झोडपेने रक्षिले याला तुझी गाडी दररोज ३ हजार कि.मी. चालणे अपेक्षित आहे. मात्र ती २ हजार कि.मी.च चालते. तेव्हा एक हजार कि.मी.चे इंधन वाचते. यासाठी महिन्याला चार हजार रुपयांची मागणी केली. यानुसार वाहन चालक-मालक रक्षिले झोडपेला चार हजार रुपये देत होता. नंतर झोडपेने जुना करारनामा रद्द करुन नवा करारनामा करण्यात येणार असल्याचे सांगितले. तसे पत्रही आपल्या स्वाक्षरीनिशी वाहनधारक रक्षिले याला दिले. यासाठी झोडपे याने रक्षिलेला जुने चार हजार कायम ठेवून नव्या करारनाम्यासाठी १० हजारांची मागणी केली. ही रक्कम द्यायची नसल्यामुळे रक्षिले याने लाचलुचपत प्रतिबंधक विभागाकडे १७ मे रोजी धाव घेतली. गुरुवारी विभागाने सापळा रचला. रक्षिले १८ हजार रुपये घेऊन झोडपेकडे गेला असता त्याने आपण गरीब असल्याचे सांगून काही रक्कम कमी करण्याची विनंती केली. तेव्हा झोडपेने १२ हजार रुपयांची लाच स्वीकारली. यानंतर एसीबी पथकाने सदर कार्यकारी अभियंत्यास ताब्यात घेतले. रात्री उशिरापर्यंत कारवाई सुरूच होती. ही कारवाई पोलीस उपअधीक्षक अनिल लोखंडे यांनी पोलीस अधीक्षक वसंत शिरभाते, अतिरिक्त पोलीस अधीक्षक संजय पुरंदरे यांच्या मार्गदर्शनाखाली करण्यात आली. (जिल्हा प्रतिनिधी)