नागपूर : कळमनातील डिप्टी सिग्नलमध्ये स्लॅब तोडण्याच्या मशीनची चोरी झाली. रायपूर येथील रहिवासी गौरीशंकर गोदी यांचे डिप्टी सिग्नलच्या बीएसएनएल कार्यालयासमोर काम सुरू आहे. तेथे गोदी यांनी सिमेंटचा स्लॅब तोडण्याची मशीन ठेवली होती. रात्रीच्या वेळी अज्ञात आरोपीने ७० हजार रुपयांच्या मशीनची चोरी केली. कळमना पोलिसांनी चोरीचा गुन्हा दाखल केला आहे.
..........
दारूच्या नशेत युवकाची आत्महत्या
नागपूर : दारूच्या नशेत एका युवकाने नवी कामठीमध्ये आत्महत्या केली. रोशन कृष्णाजी चकोले (वय २६) रा. प्रीती ले-आऊट, असे आत्महत्या केलेल्या युवकाचे नाव आहे. रोशन पेंटिंगचे काम करीत होता. त्याची पत्नीही मजुरी करते. रोशनला दारूचे व्यसन होते. त्यामुळे तो कधीतरीच कामावर जात होता. मंगळवारी सकाळी पत्नी पायल गेल्यानंतर रोशनने गळफास घेतला. नवी कामठी पोलिसांनी आकस्मिक मृत्यूची नोंद केली आहे.
............
मुलावर हल्ला करून आईला धमकी
नागपूर : आईला अपशब्द बोलण्यास मनाई केली असता एका युवकावर हल्ला करून त्यास जखमी केल्याची घटना अजनीत घडली आहे. पीयूष फ्रांसीस (वय २२) हा पार्वतीनगरात राहतो. आरोपी नेल्सन मोजेस फ्रांसीस, मोजेस फ्रांसीस, त्याची आई, अंथोनी रॉस, शेरॉन फ्रांसीस आणि नितू फ्रांसीस मंगळवारी सकाळी पीयूष फ्रांसीसच्या आईबाबत अपशब्द बोलत होते. पीयूष आरोपींना समजावत होता. आरोपींनी रॉडने वार करून पीयूषला जखमी केले. पीयूषची आई अरुण पीयूषला वाचविण्यासाठी गेली असता आरोपींनी तिला शिवीगाळ करून धमकी दिली. अजनी पोलिसांनी आरोपींविरुद्ध दंगा करण्याचा गुन्हा दाखल केला आहे.
........