सोन्यात गुंतवणुकीवर ग्राहकांमध्ये संभ्रम

गेल्यावर्षी २० टक्के तर यावर्षी सोन्यात १२ टक्के घट झाली. सोन्याच्या भावात अचानक झालेल्या घसरणीमुळे सोने खरेदीचा मोह ग्राहकांना होत आहे. सोन्याचे मूल्य फक्त वाढते, असा समज करून

तेजीचे दिवस संपले : आणखी घट होणार
नागपूर : गेल्यावर्षी २० टक्के तर यावर्षी सोन्यात १२ टक्के घट झाली. सोन्याच्या भावात अचानक झालेल्या घसरणीमुळे सोने खरेदीचा मोह ग्राहकांना होत आहे. सोन्याचे मूल्य फक्त वाढते, असा समज करून घेणाऱ्या खरेदीदारांसाठी भावातील घसरण ही आनंदाची बाब आहे. पण सोन्याची खरेदी करायची की नाही, अशा दुहेरी स्थितीत ग्राहक आणि गुंतवणूकदार आहेत.

सोन्याच्या भावातील घसरणीमुळे सोन्याचे दागिने खरेदी करण्याची ही योग्य वेळ आहे का? किंवा थोडा वेळ थांबा आणि वाट पाहा? यावर तज्ज्ञांनी भिन्न मते आहेत. भावात करेक्शन वेल्थ मॅनेजमेंट कंपनीचे संचालक सचिन पिंपळे यांनी सांगितले की, बहुतेक कुटुंबांची सोन्यामध्ये गुंतवणूक आहे. सोन्याच्या भावातील घसरण ही धक्कादायक घटना आहे. सोन्याच्या भावात फक्त वाढच होत नाही, असे गुंतवणूकदारांना घसरणीमुळे लक्षात आले. सोन्याचे भाव घसरणार नाहीत, असा समज अनेकांना झाला होता. सोन्याचा इतिहास पाहता सोन्याने चलनवाढीलाही मागे टाकले आहे. त्यामुळे सोन्याच्या भावात झालेले हे ‘करेक्शन’ गुंतवणूकदारांना अस्वस्थ करणारे ठरू नये. सोन्याच्या दागिन्यांची खरेदी ही वापर आणि गुंतवणूक, या दुहेरी उद्देशाने केली जात असल्यास खरेदीदारांनी घाबरण्याचे कारण नाही. सोन्याचा भाव ४० हजार रुपयांवर गेल्यास दागिन्यांची विक्री करणार नाही. त्यामुळे गेल्या सात वर्षांतील तेजीत एकदा ‘करेक्शन’ आल्यावर खरेदीदारांनी घाबरू नये.
गुंतवणुकीतून योग्य ‘रिटर्न’
अर्थतज्ज्ञांनी सांगितले की, गुंतवणूकदारांना सोन्यातून अल्पकालावधीत (तीन ते चार वर्षे) नफा कमवायचा असल्यास परिस्थिती वेगळी असू शकते. अल्पकालीन गुंतवणूक करताना अन्य गुंतवणुकीचा विचारही कराला हवा आणि जोखीम आणि नफा व उत्पन्न तपासायला हवे. सोन्यातून चांगले रिटर्न मिळणार असल्याचे गृहित धरल्यास अन्य गुंतवणुकीतून निश्चित रिटर्न मिळेल, अशा गुंतवणुकीच्या पर्यायांची निवड करायला हवी. चार वर्षांचा विचार केल्यास ‘जमा ठेवीत’ ४० टक्के वाढ होईल. त्यामुळे सोन्यामध्ये यापेक्षा अधिक रिटर्न्स मिळतील का हे तपासायला हवे. सोन्याच्या भावात गेल्या दहा वर्षांत तेजी दिसून आली.
गेल्या तीन वर्षांत सोन्याच्या भावात मोठी वाढ झाली. त्यामुळे आगामी काळात त्यात चांगले रिटर्न मिळण्याची शक्यता कमी आहे. सोने गुंतवणुकीच्या बाबतीत महाग झाले आहे. पुढील काही महिन्यांत रुपयाचे मूल्य महत्त्वाचे ठरणार आहे. गेल्या काही दिवसांत सोने आणि कच्च्या तेलाच्या भावात झालेल्या घसरणीचा फायदा रुपयाला होऊ शकतो. या आर्थिक वर्षांत रुपयाच्या मूल्यात आणखी काही टक्के सुधारणा अपेक्षित आहे. त्याचा प्रभाव देशांतर्गत सोन्याच्या भावावर पडू शकतो. या पाश्वर्भूमीवर सोन्याच्या भावात ‘करेक्शन’ होऊ शकते. सोन्याला २२ आणि २४ हजारांच्या पातळीवर आधार मिळू शकतो. (प्रतिनिधी)