नागपूर : गुरुवारी उपवास असताना चिकन आणणाऱ्या भावास विरोध केल्यामुळे लहान भावाने मोठ्या भावाला गंभीर जखमी केले. ही घटना सोनेगाव पोलीस ठाण्याच्या हद्दीत गुरुवारी सायंकाळी ५.३० वाजता घडली.
नितीन भगवान चिंचोळकर (४०) रा. प्लॉट नं. १२, सीतानगर हे आपल्या कुटुंबासह घरी हजर होते. गुरुवार असल्यामुळे त्यांना उपवास होता. तरीदेखील त्यांचा लहान भाऊ सचिन भगवान चिंचोळकर (३५) याने घरी चिकन आणले. नितीनने उपवास असताना चिकन का आणले, अशी विचारणा लहान भावाला केली. त्यावर सचिनने मोठ्या भावाला उलटसुलट उत्तर दिल्यामुळे नितीनने त्यास दोन चापट मारल्या. त्यामुळे संतप्त झालेल्या सचिनने घरातील कुऱ्हाडीच्या दांड्याने नितीनच्या कपाळावर, डाव्या हाताच्या मनगटावर व पायावर मारून त्यास गंभीर जखमी केले. नितीनने दिलेल्या फिर्यादीवरून सोनेगाव पोलिसांनी आरोपी सचिन विरुद्ध भादंवि ३२६ नुसार गुन्हा दाखल केला आहे.
............