'एअर इंडिया एक्स्प्रेस' उड्डाणासाठी सज्ज, १ डिसेंबरला नागपुरातून करेल 'टेक-ऑफ'

Nagpur : एअर इंडिया एक्स्प्रेस या उड्डाणांसाठी १८०-सीटर विमानाचा वापर करणार आहे. लो-कॉस्ट कॅरिअर (एलसीसी) फ्लाइट असल्याने बहुतांश प्रवाशांना याचा लाभ होणार आहे.

लोकमत न्यूज नेटवर्क
नागपूर : डॉ. बाबासाहेब आंबेडकर आंतरराष्ट्रीय विमानतळ, नागपूर येथून बेंगळुरू दरम्यान १ डिसेंबरपासून एअर इंडिया एक्स्प्रेसची सकाळ आणि सायंकाळची उड्डाणे सुरू होणार आहेत. तीन दिवसांपूर्वी या नव्या फ्लाइट्सची बुकिंग सुरू झाल्यानंतर शुक्रवारी सायंकाळपर्यंत ६० टक्क्यांहून अधिक बुकिंग पूर्ण झाली होती.

फ्लाइट क्रमांक आयएक्स-२०९७ बेंगलुरू-नागपूर सकाळी ७.२५ वाजता बेंगळुरूहून रवाना होऊन ९.३० वाजता नागपूरला पोहोचेल. परतीच्या प्रवासात आयएक्स-२०९८ नागपूर-बेंगळुरू सकाळी १० वाजता उड्डाण घेईल आणि दुपारी १२.०५ वाजता बेंगळुरूला उतरेल.

संध्याकाळी आयएक्स-२७९३ बेंगळुरू-नागपूर फ्लाइट सायंकाळी ६.३० वाजता डिपार्ट होऊन रात्री ८.३५ वाजता नागपूरमध्ये लैंड होईल. परतीची फ्लाइट आयएक्स-२७९४ नागपूरहून रात्री ९.०५ वाजता टेक-ऑफ करून ११.१० वाजता बेंगळुरूला पोहोचेल.

एअर इंडिया एक्स्प्रेस या उड्डाणांसाठी १८०-सीटर विमानाचा वापर करणार आहे. लो-कॉस्ट कॅरिअर (एलसीसी) फ्लाइट असल्याने बहुतांश प्रवाशांना याचा लाभ होणार आहे. विशेष म्हणजे, आयटी सिटी म्हणून ओळखल्या जाणाऱ्या बेंगळुरूसाठी नागपूरसह संपूर्ण विदर्भातून मोठ्या संख्येने आयटी प्रोफेशनल्सची ये-जा सुरू असते. नागपुरात या लो-कॉस्ट कॅरिअरच्या आगमनाने इंडिगो एअरलाइन्सला स्पर्धेला सामोरे जावे लागणार आहे. प्रत्यक्षात एअर इंडिया एक्स्प्रेसच्या उड्डाणांची टायमिंगही अधिक सोयीस्कर असल्याचे सांगितले जात आहे. या एअरलाइन्सला ग्राऊंड हँडलिंग सेवा एआयएएसएलच उपलब्ध करून देणार आहे. आयएक्सच्या या चार नव्या उड्डाणांच्या समावेशाने नागपूर विमानतळावरील एकूण उड्डाणांची संख्या आता ५२ वर पोहोचली आहे.