नागपूर : शेतकऱ्यांचे उत्पादन तंत्रज्ञान आणि त्यांच्या परिश्रमाला उत्तम बाजारपेठेची जोड दिली जाणार आहे. त्यासाठी कृषी विभागाच्या माध्यमातून एकदिवसीय जिल्हास्तरीय उत्पादन तंत्रज्ञान व बाजार संमेलनाचे आयोजन होणार आहे. बाळासाहेब ठाकरे कृषी व्यवसाय व ग्रामीण परिवर्तन प्रकल्प (स्मार्ट) अंतर्गत या उपक्रमाचे आयोजन होत आहे.
या संमेलनामध्ये समुदाय आधारित संस्था व खरेदीदार यांच्यामध्ये शेतमालाच्या दर्जाबाबत खरेदीदारांच्या अपेक्षा, प्रतवारीनुसार दर व त्यामुळे दरातील फरक याबाबत पीकनिहाय चर्चा तसेच शेतमाल दराबाबतचे धोरण, वाहतूक व्यवस्था, पोहोच, पॅकिंग याबाबत चर्चा होणार आहे. समुदाय आधारित संस्थांना संस्थात्मक खरेदीदारांसोबत काम केल्यास गुणवत्तापूर्ण शेतमालाला योग्य दर, खरेदीमध्ये पारदर्शकता, इतर करांमध्ये होणारी बचत, बाजार व्यवस्थापन, वाहतूक खर्चात बचत, खरेदीची हमी व खरेदीदाराला मिळणारा गुणवत्तापूर्ण शेतमाल या बाबींचा विचार दर निश्चित करताना होणार आहे.
स्मार्ट प्रकल्पांतर्गत समुदाय आधारित संस्था व खरेदीदार यांनी स्मार्ट प्रकल्पाच्या पोर्टलवर उत्पादन भागीदारी उपप्रकल्पात सहभागी होण्याकरिता अर्ज केले आहेत. सध्या पोर्टलवर ऑनलाईन अर्ज केलेल्या समुदाय आधारित संस्थांच्या प्रस्तावांची छाननी करण्यात येत आहे. यासाठी संबंधित समुदाय आधारित संस्थांचे उत्पादक भागीदारी उपप्रकल्प प्रस्ताव स्मार्ट प्रकल्पांतर्गत पात्र होण्याकरिता संस्थात्मक नोंदणीकृत खरेदीदारासोबत सामंजस्य करार होणे बंधनकारक आहे. या महिन्यातील तिसऱ्या आठवड्यात हे आयोजन होण्याची शक्यता असल्याचे स्मार्ट प्रकल्पाने कळविले आहे. यातील सहभाग नि:शुल्क असून, भाग घेऊ इच्छिणाऱ्यांना प्रकल्प संचालक, आत्मा कार्यालय येथे नोंदणी करता येणार आहे.