Uber: उबर चालकांच्या उत्पन्नात वाढ; कंपनीकडून कमिशन कपात, भाडं वाढणार का?

Uber News: उबर टॅक्सी आणि रिक्षाचालकांना मोठा दिलासा मिळाला असून कंपनीने त्यांच्या कमिशनमध्ये कपात लागू केली.

पुणे: उबर टॅक्सी आणि रिक्षाचालकांना मोठा दिलासा मिळाला असून कंपनीने गुरुवारपासून त्यांच्या कमिशनमध्ये कपात लागू केली. त्यामुळे उबर चालकांच्या उत्पन्नात नक्कीच वाढ होणार आहे, अशी माहिती महाराष्ट्र कामगार सभेचे अध्यक्ष डॉ. केशव क्षीरसागर यांनी दिली. कंपनीच्या या निर्णयामुळे चालकांमध्ये आनंदाचे वातावरण आहे. मात्र, त्याचा परिणाम प्रवाशांच्या भाडेदरावर होणार का? असाही प्रश्न उपस्थित केला जात आहे.  

क्षीरसागर यांनी दिलेल्या माहितीनुसार, "उबर कंपनीने गुरुवारी सकाळपासून टॅक्सी आणि रिक्षाचालकांकडून आकारल्या जाणाऱ्या कमिशनमध्ये कपात लागू केली आहे. त्यामुळे चालकांच्या उत्पन्नात वाढ होणार आहे. महत्त्वाचे म्हणजे, कंपनीने स्वत:चे कमिशन कमी केले असले तरी त्याचा परिणाम प्रवाशांच्या भाडेदरांवर होणार नाही. प्रवाशांना पूर्वीच्याच दरात प्रवास करता येणार आहे. त्यामुळे हा निर्णय चालक आणि प्रवासी या दोघांसाठीही फायद्याचा ठरला आहे."

क्षीरसागर पुढे म्हणाले की, उबरने त्यांच्या कमिशनमध्ये कपात करण्याचा घेतलेला निर्णय हा महाराष्ट्र कामगार सभेच्या एकजुटीचा विजय आहे. त्यांच्या प्रयत्नांचा हा परिणाम आहे. मात्र, ओला आणि रॅपिडो कंपन्या अजूनही चालकांकडून मोठ्या प्रमाणात कमिशन आकरत आहेत. परिवहन विभाग आणि जिल्हाअधिकाऱ्यांनी त्यांच्यावर कठोर कारवाई करावी, अशी त्यांनी मागणी केली. अन्यथा हा प्रश्न पुन्हा चिघळू शकतो, असाही इशारा त्यांनी दिला.