दोन दिवसांत मुख्यमंत्री, मुख्य न्यायाधीशांशी चर्चा

सर्किट बेंच : सदानंद गौडा यांची ग्वाही

कोल्हापूर : मुंबई उच्च न्यायालयाचे सर्किट बेंच होण्यासाठी आवश्यक त्या सर्व पायाभूत सुविधा, इमारती कोल्हापुरात उपलब्ध असताना वकिलांना रस्त्यावर उतरून हिंसक आंदोलन करावे लागणे हे योग्य नाही. दोन दिवसांत आपण उच्च न्यायालयाचे मुख्य न्यायाधीश व राज्याच्या मुख्यमंत्र्यांशी चर्चा करून सर्किट बेंचच्या मागणीची पूर्तता करण्यासाठी प्रयत्न करू, अशी नि:संदिग्ध ग्वाही केंद्रीय कायदामंत्री सदानंद गौडा यांनी आज, मंगळवारी कोल्हापुरातील वकिलांच्या शिष्टमंडळाला दिली.
उच्च न्यायालयाचे सर्किट बेंच कोल्हापुरात स्थापन करावे या मागणीसाठी खासदार धनंजय महाडिक यांच्या नेतृत्वाखाली कोल्हापूर जिल्हा बार असोसिएशनचे शिष्टमंडळ आज केंद्रीय कायदामंत्री सदानंद गौडा यांना भेटले. सुमारे अर्धा तास झालेल्या चर्चेत मंत्री गौडा यांनी वकिलांची मागणी समजावून घेतली.
गेल्या अनेक वर्षांपासून सुरू असलेल्या आंदोलनाची माहिती वकिलांनी मंत्र्यांना दिली. कोल्हापुरात सर्किट बेंचसाठी आवश्यक असणाऱ्या सर्व सुविधा, इमारती उपलब्ध आहेत तरीही मागणीकडे दुर्लक्ष करण्यात येत आहे म्हणून वकिलांनी आंदोलन सुरू केले. सहा जिल्ह्यांतील वकिलांनी सलग ५५ दिवस कामकाजावर बहिष्कार टाकल्यानंतर मुंबई उच्च न्यायालयाच्या मुख्य न्यायाधीशांनी दाद दिली. तीन न्यायाधीशांची समिती नेमून पाहणी करण्याचे आश्वासन दिले. ३१ जानेवारी २०१४ पर्यंत निर्णय देण्याचे आश्वासन देऊनही मुख्य न्यायाधीशांनी पाळले नाही. त्यामुळे आता वकिलांचे आंदोलन हिंसक बनत चालले आहे,अशी माहिती शिष्टमंडळातील सर्वच वकिलांनी कायदामंत्र्यांना दिली तसेच आंदोलन, पायाभूत सुविधा याबाबतची काही छायाचित्रेही दाखविली.
कोल्हापुरात सर्व सुविधा असताना आणि वकीलच आंदोलन करताहेत म्हटल्यावर सर्किट बेंचबाबत एवढा विलंब होणे योग्य नाही, असे सांगत मंत्री गौडा यांनी आश्चर्य व्यक्त केले. एखाद्या मागणीसाठी वकिलांनीच रस्त्यावर येणे अपेक्षित वाटत नाही.
विशेष म्हणजे सर्किट बेंचसाठी पायाभूत सुविधा असतानाही निर्णय प्रलंबित ठेवायचे कारण नाही. याबाबत लवकरच मुख्य न्यायाधीश व मुख्यमंत्र्यांशी बोलणार आहे. राज्यात आणि देशात भाजपचे सरकार असल्याने सर्किट बेंच होण्याबाबत अडचण येणार नाहीत, असे गौडा यांनी स्पष्ट केले.
नवी दिल्ली येथील शास्त्री भवनमध्ये मंत्री सदानंद गौडा यांना भेटलेल्या शिष्टमंडळात खासदार धनंजय महाडिक यांच्यासह बार असोसिएशनचे अध्यक्ष विवेक घाटगे, सचिव राजेंद्र मंडलिक, अजित मोहिते, राजेंद्र किंकर, प्रशांत चिटणीस, बी. आर. पाटील, सर्वोच्च न्यायालयातील डॉ. विद्या वाकळे आदी वकिलांचा समावेश होता. (प्रतिनिधी)